Viktor Gísli í úr­slita­leik Meistaradeildarinnar

Barcelona vann fimm marka sigur á danska félaginu Álaborg, 37-32, og mætir Füchse Berlin í úrslitaleiknum á morgun. Álaborg spilar um þriðja sætið við Magdeburg.

Leikurinn fór í framlengingu en hana unnu Börsungar örugglega 9-4 eftir að staðan var 28-28 í lok venjulegs leiktíma.

Barcelona var fjórum mörkum yfir í hálfleik, 15-11, en danska liðið vann upp muninn í seinni hálfleiknum og tryggði sér framlengingu með því að skora tvö síðustu mörkin.

Danski markvörðurinn Emil Nielsen varði 16 skot og 36 prósent skota sem á hann komu. Viktor varði 2 af 5 skotum sem hann reyndi við sem gerir fjörutíu prósent markvörslu.

Aleix Gómez var markahæstur hjá Barcelona með átta mörk en Luís Frade skoraði sjö mörk.