Enn fjölgar aflýsingum

Rafn Ágúst Ragnarsson skrifar 12. júní 2026 17:44

Flugferðirnar þrjár eru orðnar sex. Vísir

Sex flugferðum hefur verið aflýst hjá Icelandair í dag vegna manneklu. Greint hafði verið frá þremur þeirra en nú hafa þrjú bæst við. Kjaradeilan harðnar enn.

Guðni Sigurðsson upplýsingafulltrúi Icelandair staðfestir í samtali við fréttastofu að auk þriggja Evrópuflugferðum sem aflýst var í dag hefur flugferðum til Boston og New York seinnipartinn verið aflýst sem og fragtflugi til Liege í Belgíu.

Útlit var fyrir helgi fyrir að deila Félags íslenskra atvinnuflugmanna og Icelandair næðu sáttum. FÍA hvatti félagsmenn sína til að hlaupa undir bagga og halda áfram að selja frídaga sína.

Í fréttabréfi til félaga frá í dag segir að þeir „sem treysta sér“ séu áfram hvattir til slíks.

„Þess ber þó að geta að enginn er skikkaður í aukavinnu og mikilvægt að ganga ekki fram af þolmörkum og láta öryggið ávallt njóta vafans. Þreyta flýgur ekki í okkar bransa,“ segir í bréfinu.

Kæru félagar,

Það hefur lítið gerst þessa vikuna í fundarhöldum við viðsemjendur okkar en samninganefnd FÍA vinnur hörðum höndum að því að fara yfir samningstilboð Icelandair. Það er langt á milli aðila eins og þið hafið sjálf séð og við sjáum því fram á að samningsferlið muni taka einhvern tíma. Samtal er í gangi þó ekki sé um formlega fundi að ræða.

Því er ítrekað haldið fram í fjölmiðlum að flugmenn séu í aðgerðum og nú síðast í dag var flutt frétt þess efnis en það stenst ekki skoðun. Það er bersýnilegt að flugáætlun sumarsins einfaldlega stenst ekki álagsprófið hvað mönnun varðar. FÍA sem og almennir flugmenn vöruðu stjórnendur ítrekað við gjörnýtingarstefnunni sem gæti bitnað á Icelandair og farþegum. Stjórnendur létu varnaðarorð þessi sem vind um eyru þjóta og hafa stært sig af því að vera með enn meiri nýtingu á flugmönnum þetta sumarið samanborið við það síðasta.

Flugmenn hafa helgað líf sitt Icelandair. Þeir hafa fórnað frídögum og orlofi í gegnum tíðina til þess að bjarga deginum hjá Icelandair. Persónuleg áform eru sett til hliðar til að bjarga hlutunum. Nú sem fyrr þá hvetjum við þá sem treysta sér til að leggjast á árarnar og stökkva til á frídögum eða orlofsdögum telji flugmenn sig fullhvílda og hæfa til flugs. Það er mikilvægt að ná heyi í hús. Þess ber þó að geta að enginn er skikkaður í aukavinnu og mikilvægt að ganga ekki fram af þolmörkum og láta öryggið ávallt njóta vafans. Þreyta flýgur ekki í okkar bransa.

Góða helgi!

Icelandair Kjaramál Flug

Mest lesið

Fleiri fréttir