Ís­land frið­sælasta land heims ní­tjánda árið í röð

Á eftir Íslandi eru Nýja-Sjáland, Sviss, Slóvenía og Írland. Rússland er það land þar sem mestur ófriður er en Súdan, Lýðstjórnarlýðveldið Kongó, Úkraína og Ísrael eru í fimm neðstu sætunum.

Í skýrslu IEP kemur fram að Vestur- og Mið-Evrópa sé áfram friðsælasta svæði heims samkvæmt heimsfriðarvísitölunni 2026. Ástandið versnaði í tuttugu og tveimur af 33 löndum svæðisins, batnaði í tíu og stóð í stað í einu. Mesta afturförin varð á sviði hervæðingar, eða um 2,5 prósent, sem skýrist af almennri aukningu varnarútgjalda á svæðinu þar sem evrópsk NATO-ríki juku útgjöld sín um 20 prósent að raunvirði árið 2025.

Þrátt fyrir afturförina eru sjö af 10 friðsælustu löndum heims á svæðinu, þar sem Ísland er í fyrsta sæti á heimsvísu.

Samkvæmt skýrslunni jókst friður á Íslandi um tvö prósent á síðasta ári. Á sviði öryggis og almannavarna batnaði ástandið um fjögur prósent, sem skýrist af 42,9 prósenta bata á vísitölu ofbeldisfullra mótmæla. Á sviði yfirstandandi átaka varð engin breyting og á sviði hervæðingar batnaði ástandið lítillega, eða um 0,3 prósent.

Í skýrslunni segir að sérstaða Íslands byggist á því að hér er enginn fastur her, mjög lág tíðni glæpa og sterk félagsleg samheldni. Ísland er því með töluverðum mun friðsælasta land í heimi.

Meiri ófriður í 119 löndum

Í samantekt skýrslunnar kemur fram að um sé að ræða tólfta árið í röð sem friður í heiminum minnkar. Á síðasta ári versnaði ástandið í 99 löndum en batnaði í 62 og eru samkvæmt skýrslunni nú 119 lönd í heiminum sem eru minna friðsöm en þau voru árið 2008. Átök hafa verið helsta orsök afturfararinnar.

Þar kemur einnig fram að í fyrra hafi verið tuttugu lönd þar sem yfir þúsund manns létust í innri átökum, sem er hæsta tala frá upphafi heimsfriðarvísitölunnar, og í 18 öðrum löndum létust yfir hundrað manns á síðasta ári.

Ástandið versnaði samkvæmt skýrslunni í sjö af átta heimssvæðum árið 2025. Aðeins í Austur-Evrópu og Mið-Asíu batnaði það, þrátt fyrir yfirstandandi átök milli Úkraínu og Rússlands.