Allt jafnt í úrslitaeinvíginu

Kristianstad leiddi einvígið 1-0 eftir sigur í fyrsta leik á miðvikudaginn var en þrjá sigra þarf í einvíginu til að fagna titilinum. Liðin mættust öðru sinni í Malmö í dag en þar voru heimamenn sterkari aðilinn frá upphafi.

Staðan var jöfn 7-7 þegar fyrri hálfleikur var hálfnaður en í kjölfarið skoraði Malmö fjögur mörk í röð og þá skildu leiðir. Staðan í hálfleik var 21-14 fyrir Malmö og síðari hálfleikurinn í raun formsatriði.

Malmö vann 42-35 sigur í miklum markaleik og staðan því jöfn í einvíginu.

Einar Bragi skoraði fjögur mörk úr átta skotum og var einn sex leikmanna Kristianstad sem skoraði fjögur mörk í leiknum. Albin Nilsson Selin skoraði níu fyrir Kristianstad. Markahæstur hjá Malmö var Tim Hilding með átta mörk.

Liðin mætast þriðja sinni í Kristianstad á þriðjudagskvöldið kemur.