Viðskipti innlent

Gefa grænt ljós á kaup Nova á Ofar

Samúel Karl Ólason skrifar
Sylvía Kristín Ólafsdóttir er forstjóri Nova.
Sylvía Kristín Ólafsdóttir er forstjóri Nova. Vísir/Vilhelm

Samkeppniseftirlitið hefur gefið grænt ljós á kaup Nova á fyrirtækinu Ofar hf. (áður Origo). Lokauppgjör og frágangur viðskiptanna á samkvæmt áætlun að fara fram á næstu vikum en heildarvirði kaupanna er 4,4 milljarðar króna.

Forsvarsmönnum Nova barst samkvæmt tilkynningu tilkynning frá SKE í dag um að eftirlitið telji ekki tilefni til frekari rannsóknar eða íhlutunar vegna kaupanna.

Undirritun samnings um kaup Nova klúbbsins hf. á öllu hlutafé í Ofar fór fram þann 20. febrúar.

Sjá einnig: Nova kaupir Ofar

Þá sagði Sylvía Kristín Ólafsdóttir, forstjóri Nova sem starfaði áður hjá Ofar, þegar það hét Origo, að hún sæi fjölmörg tækifæri hjá fyrirtækinu og það yrði einstaklega spennandi að efla vöxt þess og nýta þau tækifæri sem kaupin myndu skapa.

Kaup Nova á Ofar eru fjármögnuð með nýju láni upp á 2,8 milljarða og 1,6 milljörðum í handbæru fé. Heildartekjur Ofar í fyrra voru um 7,8 milljarðar króna en rekstrarhagnaður um 360 milljónir króna.

Að kaupunum frágengnum mun Ofar hf. teljast hluti af samstæðu Nova klúbbsins hf. frá og með kaupsamningsdegi, 20. febrúar 2026. Fyrirtækin verða rekin í sitthvoru lagi undir sitthvoru vörumerkinu.

Nova Kaup og sala fyrirtækja Samkeppnismál Upplýsingatækni


Mest lesið


Fleiri fréttir

Sjá meira


×

Mest lesið