Milljóna þjófnaður úr spila­kössum, flóknar meirihlutaviðræður og lóð gróðrarstöðvar til Víkings

Flókið gæti reynst að mynda meirihluta í Reykjavík miðað við nýjustu kosningaspá Vísis. Fylgið í borginni hefur verið á nokkru flugi þegar rúm vika er til kosninga og fulltrúar flokkanna á þönum við að kynna sína stefnu. Við rýnum betur í málin með stjórnmálafræðingi í beinni útsendingu og sjáum hvaða möguleikar eru til myndunar meirihluta miðað við kannanir.

Borgarráð hefur samþykkt að afhenda íþróttafélaginu Víkingi tíu þúsund fermetra lóð í Fossvogsdalnum sem Gróðrarstöðin Mörk leigði. Við ræðum við eiganda gróðrarstöðvarinnar sem segir sorglegt að gróður og ræktun víki fyrir steypu.

Við verðum einnig í beinni útsendingu frá fundi á vegum Flugmálafélags Íslands með öllum fulltrúum flokka sem bjóða fram til borgarstjórnar um flugvöllinn í Vatnsmýri. Kristján Már Unnarsson fylgist þar með helstu vendingum.

Og við segjum frá kofa á Lynghaga í Vesturbæ Reykjavíkur sem Reykjavíkurborg vill láta fjarlægja en börnin í hverfinu eru hreint ekki sátt við þá ákvörðun.

Þetta og ýmislegt annað í kvöldfréttum okkar á samtengdum rásum Sýnar, Vísis og Bylgjunnar klukkan 18:30.