Segja engan fund á dag­skrá

Þúsundir hafa fallið í stríðinu í Íran sem staðið hefur yfir í tæplega tvo mánuði. Auk þess hafa átökin sett alþjóðahagkerfið á hliðina þar sem olía hefur snarhækkað í verði vegna lokana við Hormússund.

Pakistan hefur verið milliliður stríðandi fylkinga og friðarumleitanir hafa áður átt sér stað í Íslamabad, höfuðborg landsins.

Í yfirlýsingu Hvíta hússins í gær sagði að Steve Witkoff, fremur sérstakur erindreki Bandaríkjanna, og Jared Kushner, tengdasonur Donalds Trump Bandaríkjaforseta, myndu leggja af stað til Íslamabad í dag, laugardag, til þess að funda með Abbas Araghchi, utanríkisráðherra Írans. 

Karoline Leavitt, fjölmiðlafulltrúi Bandaríkjaforseta, sagði Írana hafa óskað eftir fundinum.

Pete Hegseth varnarmálaráðherra, eða stríðsmálaráðherra, sagði að Íranir hefðu tækifæri til að gera „góðan díl“ við Bandaríkin. Það eina sem Íranir þyrftu að gera væri að hverfa frá öllum áformum um kjarnorkuvopn, sagði hann.

Í gær kom Abbas Araqchi, utanríkisráðherra Írans, til Íslamabad en talsmaður ráðuneytis hans skrifaði á X í gær að íranskir ráðamenn hefðu það ekki á dagskrá að funda með fulltrúum Bandaríkjanna og að stjórnvöld í Teheran myndu frekar tala við milligöngumenn. Hvíta húsið hefur ekki brugðist við þessu.

Bandaríkin og Íran hafa staðið í eins konar þrátefli síðustu vikur; Íran hefur að mestu lokað Hormússundi, sem er siglingarleið fyrir um fimmtung af olíuflutningum heimsins, og á meðan hafa Bandaríkin hindrað olíuútflutning Írans um sundið.

Stríðið, sem nú er komið á níundu viku, hefur ýtt orkuverði upp í hæstu hæðir í mörg ár, ýtt undir verðbólgu og dregið úr hagvaxtarhorfum á heimsvísu, skrifa Reuters.

Trump sagði Reuters í gær, föstudag, að Íranir hygðust leggja fram tilboð sem átti að miða að því að uppfylla kröfur Bandaríkjanna.

„[Íranir] eru að gera okkur tilboð og við verðum að

Hann sagðist ekki vita hvað fælist í tilboðinu. Hann neitaði að segja við hvern Washington væri að semja. „En við erum að eiga við fólkið sem er við völd núna,“ sagði hann þó.

Leavitt fjölmiðlafulltrúi sagði að Bandaríkin hefðu séð nokkur framfaraskref af hálfu Írana undanfarna daga og vonuðust til að sjá frekari vendingar um helgina. Hún sagði að J.D. Vance varaforseti væri jafnvel tilbúinn að ferðast til Pakistans líka.

Síðustu umleitanir varaforsetans fyrir tveimur vikum skiluðu þó litlum árangri.

Þeir Vance, ⁠Witkoff, Kushner og Araqchi auk Mohammad Baqer Qalibaf slitu friðarviðræðum á laugardaginn fyrir tveimur vikum sem leiddi til þess að Bandaríkin lokuðu Hormússundi.