„Langt síðan að við vorum með svona marga uppalda“

Aðeins einu stigi munaði á deildarmeisturum Vals og FH í Olís deildinni í vetur. Liðin unnu sitt hvorn útileikinn þegar þau mættust og Águst ber mikla virðingu fyrir FH.

„Þeir eru auðvitað bara feykilega öflugir og vel mannaðir. Með unga og efnilega stráka, til dæmis Ómar [Darra Sigurgeirsson] og Garðar [Inga Sindrason] sem hafa verið mjög öflugir. Í bland við reynda og góða leikmenn. Þetta er ekkert ósvipuð blanda og er hjá okkur, þannig að ég held að það sé svakalegt einvígi framundan,“ sagði Ágúst á blaðamannafundi við bensínstöð Olís á miðvikudag.

Þjálfarinn segir það líka enga tilviljun að þessi lið hafi verið best í Olís deildinni í vetur.

„Bæði lið spila yfirleitt 6-0 varnarleik, eru með góða markverði og vilja keyra hraðaupphlaup. Bæði lið eru með mjög flinka og spræka stráka sóknarlega. Við spilum að mörgu leiti líkan bolta. FH-ingarnir eru sterkir og það er erfitt að eiga við þá. Þetta eru svipuð lið og spila bæði góðan handbolta.“

Ungir leikmenn beggja liða hafa slegið í gegn í úrslitakeppninni. Ofan nefndir FH-ingar hafa verið öflugir. Hjá Valsmönnum hefur Gunnar Róbertsson gert sig gildandi sóknarlega og fleiri ungir uppaldir leikmenn eru í liðinu.

„Það er svolítið langt síðan að við vorum með svona marga uppalda í liðinu. Þannig að ég er mjög spenntur að sjá þá í þessu einvígi. Ég finn fyrir mikilli spennu í Valsheimilinu og á von á fullu húsi,“ sagði Ágúst.