Sport

Stór­slasaður eftir að hafa verið blind­fullur á hjóli

Sindri Sverrisson skrifar
Robert Kranjec þekkir það vel að ferðast á ógnarhraða á skíðum en virðist einnig hafa verið á mikilli ferð á reiðhjóli sínu og auk þess mjög ölvaður.
Robert Kranjec þekkir það vel að ferðast á ógnarhraða á skíðum en virðist einnig hafa verið á mikilli ferð á reiðhjóli sínu og auk þess mjög ölvaður. Getty/Stanko Gruden

Slóvenska skíðastökkshetjan og ÓL-verðlaunahafinn Robert Kranjec endaði á sjúkrahúsi, alvarlega slasaður, eftir hjólreiðaslys. Samkvæmt slóvenskum miðlum var hann mjög ölvaður þegar slysið varð og sætir nú lögreglurannsókn.

Slysið mun hafa orðið með þeim hætti að Kranjec hjólaði yfir á öfugan vegarhelming og upp á kant með þeim afleiðingum að hann féll og slasaðist alvarlega.

Slóvenska skíðasambandið hefur staðfest að Kranjec liggi á sjúkrahúsi.

„Við viljum upplýsa ykkur um að Robert Kranjec slasaðist alvarlega eftir að hafa dottið af hjólinu sínu og er hann nú í meðferð á sjúkrahúsi. Heilsufar hans er stöðugt og á næstu dögum mun hann hefja endurhæfingu, sem verður löng og krefjandi,“ segir í yfirlýsingu sambandsins.

Samkvæmt Slovenske Novice hefur lögreglan nú hafið rannsókn á tildrögum slyssins og gæti Kranjec hlotið dóm fyrir brot á umferðarlögum. Miðillinn hefur þær upplýsingar frá lögreglunni að Kranjec hafi mælst með 2,5 prómill af áfengi í blóði.

Þó að Kranjec, sem er 44 ára og vann ÓL-brons árið 2002, sé hættur að keppa í skíðastökki þá hefur hann áfram hjálpað slóvenska landsliðinu með því að sníða og sauma keppnisföt.

Skíðaíþróttir

Mest lesið


Fleiri fréttir

Sjá meira


×

Mest lesið