„Al­gjört kjaft­æði og menn verða að fara taka sig að­eins saman í and­litinu“

„Mér fannst við í fyrri hálfleik ekki nógu góðir, við vorum of passívir og við leyfðum þeim að spila boltanum alltof mikið“ sagði Lárus Orri Sigurðsson þjálfari ÍA eftir leik.

„Við stigum ekki nógu hátt á þá og vorum í raun kannski áhorfendur stóran hluta af fyrri hálfleik. Það er eitthvað sem að við viljum ekki standa fyrir að leyfa liðum bara að spila fyrir framan okkur“

„Fyrri hálfleikur hjá okkur var ekki góður en samt í raun voru þeir ekkert að skapa sér neitt þannig lagað sér og við fáum alveg dauðafæri undir lok fyrri hálfleiks“

Það var allt annað að sjá til Skagaliðsins í seinni hálfleik og þeir mættu af krafti út í seinni.

„Í seinni hálfleik þá kom allt annað lið út hjá okkur og við stigum miklu harðar upp á þá og bara herjuðum á þá í 45 mínútur í seinni hálfleik og fengum nokkur mjög góð færi“

„Ég er að reyna að hugsa hvaða færi þeir fengu í leiknum og það er ekkert sem poppar upp í hausinn þannig jú ég er alveg hundsvekktur“

„Ég er hundsvekkur með frammistöðuna hjá okkur að hluta til í fyrri hálfleik en líka bara fúll yfir því að fara ekki með neitt héðan“

Lárus Orri Sigurðsson hélt svo eldræðu um frammistöðu þriðja liðsins í kvöld en sigurmark Breiðabliks kom eftir vítaspyrnu sem var heldur vafasöm þegar hendi var dæmd á Viktor Jónsson inn í teig en boltinn virtist fara af lærinu á honum og upp í hendina sem hefði þar að leiðandi ekki átt að vera vítaspyrna.

„Dómarateymið var lang lélegasta liðið á vellinum, lang lélegasta. Það er bara dómarinn sem verður þess valdandi að við töpum leiknum á endanum“

„Hann dæmir á okkur víti sem átti ekki að vera víti og við áttum svo að fá klárt víti í seinni hálfleik þegar það er neglt í höndina á honum Höskuldi“

„Þegar dómararnir missa svona stór atvik þá er það bara mjög slæmt“

Þetta var þó ekki það eina sem gerðist í leiknum en það kom rautt spjald á bekkina undir lok leiks en þeir fengu líka gult í lok fyrri hálfleiks.

„Það voru smá læti hérna, ekkert stórt og stjórn hans á leiknum var nátturlega bara alveg út í hött“

„Fjórði dómarinn sem er hérna á hliðarlínunni, ég veit ekki hvað hann var að gera allan leikinn og þetta er ekki í fyrsta skipti sem að við erum með þennan strák sem fjórða dómara. Hann er bara arfaslakur í þessu“

„Að þeir skuli gefa Jón Guðna [Fjóluson] og Deano [Dean Martin] rauð spjöld fyrir þetta. Þeir voru að takast aðeins á og voru að rífast þeir tveir sín á milli og svo takast bara menn í hendur eftir leik og þetta er búið“

„Það er verið að búa til einhverja dramatík úr þessu og henda rauðum spjöldum á menn. Þetta er bara algjört kjaftæði og menn verða að fara taka sig aðeins saman í andlitinu og fara leyfa mönnum að vera aðeins ástríðufullir í þessu og ekki vera búa til einhverja dramatík“

„Það gerðist svo fyrir hálfleikinn að það var einhver fundur með fyrirliðum og svo fundur með sitthvorum þjálfaranum áður en við fórum í seinni hálfleikinn. Þetta er bara algjört bull“ sagði Lárus Orri Sigurðsson.