„Já, ég er dá­lítið reiður“

Þing Kennarasambandins var sett á Hilton hótelinu í morgun og hélt Inga Sæland, barna og menntamálaráðherra, erindi í upphafi þingsins. Kom Inga víða við í ræðu sinni og er óhætt að segja að undirtektir kennara í salnum hafi verið misjafnar. 

Lýsti Inga meðal annars skoðun sinni að nota ætti tölustafi í einkunnagjöf í grunnskólum en ekki bókstafi eða önnur form. 

„Ég veit að það er umdeilt í ykkar hópi en mér finnst það skipta máli og það skiptir máli að þetta er í samræmi við það sem meirihluti foreldra og samfélagsins vill,“ sagði ráðherra í ræðu sinni sem áætlað var að tæki fimmtán mínútur en var hálftími.

Populísk skoðun sem rími ekki við þá fagmennsku sem þarf

Magnús Þór Jónsson, formaður Kennarasambands Íslands, var afar ósáttur með orð ráðherra um námsmatið.

„Ég verð að fá að lýsa yfir gríðarlegum vonbrigðum með það að hún hafi hent hér framan í þingið okkar breytingum sem hún segist vera búin að tilkynna og ákveða að gera sem munu hafa áhrif á námsmat í grunnskóla.“

Vísaði hún til könnunar Maskínu í október þar sem fram kom að yfirgnæfandi meirihluti landsmanna væri hlynntur einkunnagjöf í tölustöfum frekar en bókstöfum.

„Þetta getur ekki verið neinum til gæfu að vísa í samtöl við fólk utan skólakerfisins eða skoðanakannanir eða einstök bréf sem stjórnmálamenn fá til að lyfta upp popúlískri skoðun sem rímar ekki við þá fagmennsku sem þarf að ríkja í þessum ákvörðunum. Þannig að já, ég er dálítið reiður.“

Skýtur fast á vinnubrögðin

Vinnubrögðin gangi þvert á vinnureglur sem hafi verið viðhafðar um samtal ríkisstjórna og stéttarfélaga. 

Orð Ingu hafi verið vont innlegg á þingið og Kennarasambandið muni óska eftir upplýsingum um hvernig eigi að snúa við kerfi sem fjárfest hafi verið í af kennurum og stuðlað að farsælli tengingu á milli grunnskóla og framhaldsskóla.

„Það er auðvitað verulega mikil vonbrigði að við búum í þeim veruleika að ríkisstjórn Kristrúnar Frostadóttur ætli að halda áfram að kasta til okkar hlutum sem ganga þvert gegn ríkjandi aðalnámskrá,“ sagði Magnús Þór Jónsson formaður Kennarasambands Íslands.