Eftir töluvert af færum í fyrri hálfleik sem ekki tókst að nýta setti Alexandra Jóhannsdóttir boltann í netið með laglegum skalla á 47. mínútu.

Stelpurnar okkar voru sterkari aðilinn allan leikinn og átti marga góða sóknarkafla.

Ísland sótti vel á mark gestanna en tókst þó ekki að bæta við fleiri mörkum.

Einkunnir Íslands í leiknum:

Cecilía Rán Rúnarsdóttir, markvörður [7]

Örugg í sínum aðgerðum í markinu. Varði stórkostlega ein á móti Roksolana Kravchuk sem fékk auða flugbraut að marki Íslands. Að öðru leyti var lítið að gera í markinu.

Sædís Rún Heiðarsdóttir, vinstri bakvörður [7]

Lítið að gera varnarlega fyrir Sædísi í dag en stóð vaktina sína af prýði.

Ingibjörg Sigurðardóttir, miðvörður [6]

Það var svo sem ekki mikið að gera fyrir varnarlínu Íslands en skilaði sínu vel í dag.

Glódis Perla Viggósdóttir, miðvörður (fyrirliði) [8]

Leiðtoginn okkar í landsliðinu átti góða frammistöðu í dag. Hvort sem það var í hjarta varnarinnar eða í sókninni. Átti stoðsendinguna í markinu og var nálægt því að skora sjálf.

Guðrún Arnardóttir, hægri bakvörður [6]

Lítið að gera fyrir varnarmenn liðsins í kvöld en átti góða kafla og skilaði sínu.

Hildur Antonsdóttir, miðjumaður [6]

Lék vel á miðsvæðinu og skilaði sínu.

Alexandra Jóhannsdóttir, miðjumaður [8]

Spræk sóknarlega á miðjunni og skoraði fyrsta mark Íslands í leiknum. Átti skalla seint í síðari hálfleik sem gestunum tókst að verja á línunni.

Karólína Lea Vilhjálmsdóttir, miðjumaður [7]

Sá um föstu leikatriðin og gerði það vel. Iðinn í sínu fagi og skilaði sínu.

Sveindís Jane Jónsdóttir, vinstri kantur [7]

Alltaf hætta hjá Sveindísi þegar hún tekur löng innköst. Eitt slíkt skilaði okkur góðu marki í dag.

Thelma Karen Pálmadóttir, hægri kantur [7]

Gaman að sjá Thelmu takast á við það verkefni að vera í byrjunarliðinu í kvöld. Engin skjálfti og virtist bara klár í verkefnið. Gerði vel í nokkur skipti á hægri kantinum og bara spennandi að fylgjast með henni í landsliðstreyjunni.

Sandra María Jessen, framherji [7]

Virkilega spræk í fremstu línu og dugleg að ógna marki gestanna.

Varamenn

Hlín Eiríksdóttir kom inn fyrir Thelmu Karen Pálmadóttur á 65. mínútu [6]

Náði fínu skoti en tókst ekki að setja mark sitt á leikinn.

Linda Líf Boama kom inn fyrir Söndru Maríu Jessen á 65. mínútu [6]

Náði ekki alveg að koma sér inn í leikinn í fremstu línunni.

Emilía Ásgeirsdóttir kom inn fyrir Karólínu Leu Vilhjálmsdóttur á 75. mínútu [6]

Kom spræk inn á völlinn og sýndi að hún getur haldið boltanum vel. Náði hins vegar ekki að skapa nein hættuleg færi.

Ída Marín Hermannsdóttir kom inn fyrir Hildi Antonsdóttir á 83. mínútu []

Spilaði ekki nóg til að fá einkunn.