„Ég vildi óska þess að ég hefði ekki verið svona mikið veik“

Á meðan Team Esbjerg hefur tryggt sér sæti í átta liða úrslitum Meistaradeildarinnar og unnið deildarkeppnina í dönsku deildinni hefur það að hluta til verið án Noru Mörk á vellinum.

„Ég hef legið og hlaðið batteríin í góðan tíma. Þannig að það hefur verið gaman að spila smá handbolta aftur,“ sagði Nora Mørk í viðtali við TV2-sjónvarpsstöðina.

Mörk var ekki með í síðasta landsliðsverkefni norska kvennalandsliðsins í febrúar.

Þetta var alveg svakalegt

„Þetta var alveg svakalegt. Magapest, streptókokkar, hiti og allt mögulegt. Ég hef verið frekar slöpp en er núna næstum því komin til baka,“ sagði Mörk. Hún hefur því farið í gegnum næstum allan veikindalistann sem móðir smábarns.

Mørk varð móðir dótturinnar Tyru í maí á síðasta ári, sem er núna byrjuð í leikskóla. Það hefur bitnað bæði á móðurinni og föðurnum, Jerry Tollbring sem er sænskur handboltamaður.

Verið smá streituvaldur

„Líkamlega formið hefur kannski verið betra en það er núna – það var best í desember. Þetta hefur verið smá streituvaldur þegar ég næ ekki að hámarka frammistöðuna – það er svolítið erfitt þegar ég ligg og æli,“ sagði Mörk með bros á vör.

„En maður verður að gera sitt besta. Ég vildi óska þess að ég hefði ekki verið svona mikið veik, en því fæ ég ekki breytt. Ég get spilað handbolta núna og svo verðum við að vona að líkaminn haldist í lagi það sem eftir er af tímabilinu,“ sagði Mörk.

Hefur ekki fengið að hitta barnið

Hún er nú með norska landsliðinu. Það er góð tilbreyting frá erfiðu veikindatímabili – og ánægjulegir endurfundir með liðsfélaga og nágranna, Henny Reistad, besti handboltakonu heims undanfarin ár.

„Henny frænka þurfti að vera í einangrun. Við gátum ekki tekið neina áhættu. Mars hefur verið erfiður fyrir hana líka. Hún hefur ekki fengið að hitta Tyru, en þar hef ég verið mjög ákveðin,“ sagði hin 35 ára gamla Mörk og horfir á Reistad.

„Það hefur gerst einu sinni að hún smitaðist af magapest og við höfum ekki efni á því núna. Þannig að það hafa verið strangar reglur,“ sagði Mörk og hlær.