„Allt í einu var munurinn orðinn allt­of mikill“

„Við áttum í erfiðleikum með að spila vörn á móti þeim í dag,“ sagði Stefán eftir leikinn en munurinn var mestur ellefu mörk á milli liðanna.

Það var jafnræði með liðunum í fyrri hálfleik þrátt fyrir að Haukar virtust alltaf leiða með einu eða tveimur mörkum. Haukar tóku hins vegar öll völd á leiknum í seinni hálfleik.

„Það kemur kafli þarna í seinni hálfleik þar sem við fáum of mikið af brottvísunum og annað hvort töpum boltanum eða klikkum á dauðafærum. Allt í einu var munurinn orðinn alltof mikill of snemma. Við hefðum þurft að geta haldið þessum leik jöfnum aðeins lengur.“

Stefán leit til baka og sagði að liðið hefði mögulega getað gert betur í deildarkeppninni og tryggt sér heimaleikjaréttinn því það sé erfitt að spila oddaleik á útivelli. 

„Við förum kannski illa að ráði okkar í deildarkeppninni að ná ekki að enda ofar og vera með heimaleikjaréttinn. Það er erfitt að koma á Ásvelli í oddaleik og þurfa að vinna.“

„Þetta er eitthvað sem við lærum af. Við erum með gjörbreytt lið frá því í fyrra og erum með marga unga leikmenn í stórum hlutverkum. Það eru margir í liðinu sem hafa bætt sig gríðarlega í vetur og það hafa verið miklar framfarir hjá leikmönnum.“

Þrátt fyrir að vera úr leik sagðist hann stoltur af leikmönnum sínum sem hafa gert sig gildandi í Olís-deildinni í vetur.

„Þetta er verkefni hjá okkur sem er til nokkurra ára. Við stigum mjög stórt skref í vetur með margt og ég er hrikalega stoltur af liðinu mínu og hvernig við spiluðum. Auðvitað hefðum við mátt enda þetta betur en það eru ótrúlega margir leikmenn hjá mér sem hafa tekið risa skref í átt að því að verða klassa Olís-deildar leikmenn og við munum byggja á því á næsta tímabili.“