Var sagt að þetta væri „hluti af því að vera kona“

Bindi hefur verið í sviðsljósinu stóran hluta ævi sinnar en þá sérstaklega eftir að faðir hennar lést á hörmulegan hátt fyrir 20 árum. Steve lést við tökur á heimildarmyndinni „Ocean's Deadliest“ í Ástralíu eftir að stingskata stakk hann í hjartastað. 

En Bindi, sem er tuttugu og sjö ára gömul, deildi í morgun myndum af sér á Instagram þar sem hún liggur í sjúkrarúmi en með þeim fylgir meðal annars lýsing á þeim aðgerðum sem hún hefur þurft að gangast undir síðustu ár. 

Þar segir hún einnig frá því að hún hafi fundið fyrir miklum sársauka í mörg ár án þess að fá greiningu á sjúkdómnum. Þar af leiðandi hafi hún upplifað sig veikburða og óörugga en hún hvetur fólk í svipuðum sporum til þess að leita svara.

Marsmánuður er, líkt og Bindi segir, tileinkaður þeim sem þjást af endómetríósu en fyrr í mars ræddi fréttastofa við Jón Ívar Einarsson, sérfræðing í fæðinga- og kvensjúkdómalækningum, um mögulega nýja greiningaraðferð.

Einnig var rætt við Önnu Margréti Hrólfsdóttur, sem hefur sinnt starfi framkvæmdastjóra Endósamtakanna síðan haustið 2023, en þau halda meðal annars utan um fyrrnefndan Endómars. 

„Allt sem einfaldar ferlið við að fá greiningu og aðstoð verður stór mál fyrir okkar hóp, aðgerð er risastórt inngrip, oft er sjúkdómurinn meðhöndlaður án þess að fara í uppskurð en það gefur svo mikla ró að vita fyrir víst að maður sé með endó,“ sagði hún í samtali við Vísi.