Hellisheiðin opin að nýju og snjó­koma í borginni

 Eldur mun hafa komið upp í snjóruðningstæki að því er greint var frá á mbl.is í morgun en ökumanninn mun ekki hafa sakað. Einnig er opið um Þrengslaveg og Sandskeið. Annars er færðin nokkuð þung í höfuðborginni nú í morgunsárið og viðbúið að morgunumferðin gangi hægar en venjulega.

Krapi er á Grindavíkurvegi en snjóþekja er á flestum leiðum, t.d Sandskeiði, Þrengslum, Reykjanesbraut, Suðurstrandarvegi og Krýsuvíkurvegi, en þungfært er á Mosfellsheiði að því er segir í tilkynningu Vegagerðarinnar. Þæfingur er á Holtavörðuheið. Þungfært er yfir Fróðárheiði.

Á Vestfjörðum er svo snjóþekja, hálka eða hálkublettir á flestum leiðum. Þæfingur er á Vopnafjarðarheiði en snjóþekja og hálka eru mjög víða á vegum. Á Austurlandi er snjóþekja og hálka víða á vegum. Ófært er um Öxi og Breiðdalsheiði.