Hand­tóku mann fyrir að stela dekkjum

Í tilkynningu frá lögreglu, þar sem segir frá verkefnum gærkvöldsins og næturinnar, kemur fram að maðurinn hafi verið handtekinn á svæði lögreglustöðvar 2 sem nær yfir Garðabæ og Hafnarfjörð en ekki eru gefnar nánari upplýsingar um málið.

Miðsvæðis í Reykjavík var ökumaður stöðvaður í akstri grunaður um akstur undir áhrifum fíkniefna. Við leit í bíl mannsins fundust einnig fíkniefni og er hann grunaður um sölu og dreifingu þeirra. Maðurinn var handtekinn og færður í fangageymslu.

Einnig var lögregla þrívegis kölluð út vegna þjófnaðar í verslun og var málið leyst á vettvangi. Sömuleiðis var tilkynnt um menn að brjóta sér leið inn í iðnaðarhúsnæði. Þar voru þrír handteknir á staðnum og er málið í rannsókn.

Enn fremur segir að leigubílstjóri á höfuðborgarsvæðinu hafi óskað eftir aðstoð vegna ofurölvi farþega.