Meistaraskjöldurinn kom ó­vænt í leitirnar

Berlínarbúar urðu fyrir miklu áfalli í nóvember síðastliðnum þegar brotist var inn í félagsheimili Fuchse Berlin. Þjófarnir voru sagðir hafa rænt skildinum fræga og einhverju reiðufé. 

Um var að ræða upprunalega eintakið af þýska meistaraskildinum og tjónið því töluvert, tilfinningalega og fjárhagslega. Talið var að skjöldurinn hefði verið bræddur og silfrið selt á svörtum markaði.

Nú hefur hins vegar komið í ljós að skildinum var alls ekki stolið, eða allavega ekki almennilega.

„Ég trúi þessu ekki enn þá, ef ég á að vera alveg hreinskilinn, en skjöldurinn er snúinn aftur. Við getum öll glaðst yfir því að haldið verði í hefðirnar og næstu meistarar muni lyfta sama skildi og allir aðrir Þýskalandsmeistarar í sögunni,“ sagði Bob Hanning, yfirmaður hjá Fuchse Berlin.

„Nýlega fannst skjöldurinn í kjallara félagsins. Þjófarnir höfðu greinilega komið honum þar fyrir í felum og ætlað að stela honum síðar, en þegar upp komst um stuldinn hafa þeir hætt við plönin,“ sagði Hanning einnig.

Ríkjandi meistararnir frá Berlín munu að öllum líkindum sjá skjöldinn fara til Magdeburg í vor en Íslendingaliðið er með sex stiga forystu á toppnum og hefur aðeins tapað einum leik.