Lög­reglu­stöðinni verði lokað verði hús­næðið ekki lagað

„Húsnæðis- og aðstöðumál lögreglumanna á Ísafirði hafa verið í algerum ólestri mörg undanfarin ár og þrátt fyrir ítrekuð afskipti, úttektir og skýrslur Vinnueftirlitsins og stanslausar ábendingar embættisins og starfsmanna þess um meðal annars rakaskemmdir og myglu,“ segir í ályktun stjórnar Landssambands lögreglumanna.

Að auki myglunnar er einnig ófullnægjandi loftræsting í vinnurýmum lögreglustöðvarinnar og loftræstikerfið að auki ótengt. Þá er ófullnægjandi lýsing á lögreglustöðinni, vatnsleki í veggjum, hita- og rakastig á vinnustöðvum í ólagi, búnings- og salernisaðstaðan óboðleg og brunavarnarkerfið aftengt.

Stjórnin telur að augljóslega hafi nauðsynlegu og eðlilegu viðhaldi ekki verið sinnt í lengri tíma og hefur það slæm áhrif á starfandi lögreglumenn. 

„Stjórn Landssambands lögreglumanna harmar sinnuleysi yfirvalda í nauðsynlegum úrbótum í húsnæðis- og aðstöðumálum lögreglustöðvar á Ísafirði og krefst tafalausra aðgerða þeirra sem fara með fasteignamál ríkisins að þessu leyti. Ljóst er að í algert óefni er komið og aðgerðir þola enga bið,“ segir í ályktuninni.

Hún segir að verði ekki brugðist við „með skýrum og ótvíræðum hætti“ á næstunni þurfi að loka lögreglustöðinni á grundvelli laga. Vísað er í lög um vinnuvernd, um aðbúnað, hollustuhætti og öryggi á vinnustöðum og um húsnæði vinnustaða.

„Núverandi aðbúnaður og starfsaðstaða lögreglumanna á Ísafirði er með öllu óboðlegt ástand og gerir erfitt um vik með störf.“