Vann brons og bætti Ís­lands­metið um þrjá sentí­metra

Guðrún kastaði sleggjunni 71,41 metra á Evrópubikarkastmótinu á Kýpur í dag. Hún bætti þar með Íslandsmetið sem hún setti í fyrra um þrjá sentímetra.

Guðrún varð í 3. sæti í keppninni í dag en hin danska Katrine Jacobsen varð hlutskörpust með kasti upp á 75,52 metra. Það er lengsta kast ársins og danskt met.

Hin 23 ára Guðrún var í 17. sæti á Evrópulistanum í sleggjukasti og 37. sæti á heimslistanum fyrir mótið á Kýpur.

Guðrún sló Íslandsmet Elísabetar Rutar Rúnarsdóttur á Íslandsmótinu í frjálsum íþróttum í ágúst í fyrra og keppti í kjölfarið á HM í Japan. Þar kastaði hún lengst 64,94 metra.

Í ágúst á þessu ári fer Evrópumótið fram í Birmingham á Englandi. Lágmarkið inn á mótið í sleggjukasti er 71,50 metrar.