Sig­valdi á leið í faðm Guð­jóns Vals eða Heiðmars?

Þýski miðillinn Sport Bild segir að Sigvaldi sé orðaður við Gummersbach og Hannover Burgdorf, og því útlit fyrir að hann sé að fara að fá íslenskan þjálfara.

Guðjón Valur Sigurðsson er aðalþjálfari Gummersbach sem er á gríðarlegri siglingu og skellti Kiel með mögnuðum hætti í gær, 34-26, eftir að hafa unnið seinni hálfleikinn 20-11. Gummersbach hefur unnið fimm síðustu leiki sína í röð og er í 6. sæti þýsku 1. deildarinnar, og eflaust spennandi kostur fyrir Sigvalda sem gæti orðið liðsfélagi Elliða Snæs Viðarssonar og Teits Arnar Einarssonar.

Hinn kosturinn sem Sport Bild nefnir er Hannover Burgdorf, þar sem Heiðmar Felixson er aðstoðarþjálfari. Félagið er á höttunum eftir hægri hornamanni í ljósi þess að fyrirliðinn Marius Steinhauser fer til Rhein-Neckar Löwen í sumar. Burgdorf er ekki langt á eftir Gummersbach en þó í 9. sæti.

Eins og Sport Bild bendir á í grein sinni þá hefur Kolstad þurft að draga saman seglin eftir að hafa spennt bogann afar hátt og ætlað sér að verða stórlið í Evrópu. Félagið hefur greint frá ítrekuðum fjárhagserfiðleikum og þurft að láta launahæstu leikmenn sína fara, nú síðast til að mynda sænska markvörðinn Andreas Palicka sem fór til Wetzlar og fer svo til Füchse Berlín í sumar.