Maður skotinn til bana við Mar-a-Lago

Atvikið átti sér stað klukkan hálf sjö í morgun á íslenskum tíma samkvæmt BBC sem greinir frá.

Fulltrúar lífvarðarsveitar forsetans segjast hafa séð til mannsins við norðurhlið hússins, fyrir innan hliðið við bygginguna, með það sem leit út fyrir að vera haglabyssa og gaskútur. 

Ric Bradshaw, lögreglustjórinn í Palm Beach, staðfestir þessa frásögn á blaðamannafundi.

Hann lýsir því hvernig fulltrúar lögreglunnar og lífvarðrarveitarinnar hafi farið til að ræða við manninn og skipað honum að leggja frá sér báða hlutina. Maðurinn lagði frá sér gaskútinn en mundaði haglabyssuna. Vegna þessa skutu fulltrúar lögreglunnar og lífvarðarsveitarinnar manninn. 

Ekki liggur fyrir hversu mörgum skotum var skotið. Þá liggur ekki fyrir hvort skotfæri hafi verið í haglabyssunni.

Hann var úrskurðaður látinn á vettvangi. Samkvæmt umfjöllun Sky News var sá látni frá Norður-Karólínu-fylki og hafði verið tilkynntur til lögreglu sem týndur. 

Uppfært 16:38: Lögreglan hefur greint frá að maðurinn hét Austin Martin og var 21 árs gamall frá Norður-Karólínu-fylki.

Hér má sjá hvar Mar-a-Lago er.

Anthony Guglielmi, fulltrúi lífvarðarsveitarinnar, sagði að grunur væri um að hann hefði yfirgefið fylkið og keypt byssu á leiðinni til Flórída. Kassinn utan um byssuna fannst í ökutæki mannsins. Hann hafði keyrt í gegnum hliðið inn í Mar-a-Lago á sama tíma og öðru ökutæki var keyrt út.

Alríkislögreglan fer með rannsókn málsins og óskar eftir því að íbúar í nágrenni hússins skoði myndefni úr öryggismyndavélum.

Trump ver gjarnan helgunum sínum þar og spilar golf. Hann og Melania Trump forsetafrú voru hins vegar í Hvíta húsinu í nótt. Klúbburinn er í Flórída-fylki í Bandaríkjunum.

Þann 13. júlí 2024 reyndi Thomas Matthew Crooks að skjóta Trump til bana en hæfði hann í hægra eyrað. Þann 15. september 2024 var Ryan Weseley Routh handtekinn grunaður um banatilræði gegn Donald Trump á golfvelli hans í Flórída. 

Fréttin hefur verið uppfærð.