Þrír látnir í skot­á­rás á íshokkíleik: „Hugsan­lega vegna fjölskylduerja“

Tina Goncalves, lögreglustjóri í Pawtucket, sagði fréttamönnum að einhver hefði hjálpað til við að binda skjótan enda á ofbeldisfullt atvikið á mánudagseftirmiðdegi með því að grípa inn í og reyna að yfirbuga árásarmanninn, sem var á leikvanginum til að horfa á íshokkíleik hjá fjölskyldumeðlim.

Árásarmaðurinn lést af völdum skotsárs sem hann virðist hafa veitt sér sjálfur, sagði hún og tók fram að yfirvöld væru enn að rannsaka málið.

Virðist hafi verið markviss árás

„Svo virðist sem þetta hafi verið markviss árás, hugsanlega vegna fjölskylduerja,“ sagði hún.

Goncalves nafngreindi árásarmanninn sem Robert Dorgan, sem hún sagði að hefði einnig gengið undir nafninu Roberta Esposito og væri fæddur árið 1969. Goncalves gaf ekki upplýsingar um aldur þeirra sem létust, en sagði að svo virtist sem bæði fórnarlömbin hefðu verið fullorðnir. Þeir þrír sem særðust voru á sjúkrahúsi í lífshættu á mánudagskvöld.

Skotárásin átti sér stað í stúkunni á Dennis M. Lynch Arena í Pawtucket, nokkrum kílómetrum fyrir utan Providence.

Leikurinn í beinni útsendingu

Leikur framhaldsskólaliðanna tveggja var í beinni útsendingu. Nokkur byssuskot heyrðust á myndbandi sem síðar birtist á samfélagsmiðlum þar sem leikmenn og þjálfarar hlupu af svellinu á gagnstæðum enda skautasvellsins. Önnur myndbönd sýndu nokkra leikmenn, enn á skautum, leita skjóls í nærliggjandi verslunum.

„Ég var á svellinu og hélt fyrst að þetta væru blöðrur,“ sagði Olin Lawrence, markvörður í öðru liðinu, við WJAR, NBC-stöðina í Rhode Island. „Það heyrðist bara popp, popp, popp og ég hélt að þetta væru blöðrur. En það hélt bara áfram og þetta voru í raun byssuskot. Og eftir skothríðina hlupu ég og liðsfélagar mínir beint inn í búningsklefa og földum okkur þar inni. Við þrýstum okkur upp að hurðinni og reyndum bara að vera öruggir.“

„Þetta var mjög ógnvekjandi“

„Þetta var mjög ógnvekjandi. Við vorum mjög stressaðir.“

Fyrir utan leikvanginn mátti sjá grátandi fjölskyldur og framhaldsskólaleikmenn í íshokkíbúningum faðmast áður en þeir fóru um borð í rútu til að yfirgefa svæðið. Vegum í kringum leikvanginn var lokað vegna mikils lögregluviðbúnaðar en þeir voru opnaðir aftur seint á mánudagseftirmiðdegi.

Í færslu á samfélagsmiðlum sagði Boston Bruins-liðið vera „sorgmætt yfir því að staður sem ætlaður er til að fagna íshokkí og sameina fólk hafi orðið fyrir slíku ofbeldi.“

Stóru íþróttaliðin Red Sox, Patriots, Celtics og Revolution sendu öll frá sér stuðningsyfirlýsingar.

Skotárásin á sér stað tæpum tveimur mánuðum eftir að Rhode Island varð fyrir öðrum hörmulegum atburði tengdum byssuofbeldi í Brown-háskóla, þar sem byssumaður myrti tvo nemendur og særði níu aðra. Sá árásarmaður myrti einnig prófessor við Tækniháskólann í Massachusetts. Yfirvöld fundu síðar Claudio Neves Valente, 48 ára, látinn af völdum skotsárs sem hann veitti sér sjálfur í geymsluaðstöðu í New Hampshire.

„Sem betur fer eru atvikin tvö ótengd, en þetta er mjög sorglegt,“ sagði Don Grebien, borgarstjóri Pawtucket. „Þetta eru krakkar í framhaldsskóla, þau voru á viðburði, þau voru að spila fyrir framan áhorfendur og svo breyttist þetta í þetta.“