Mikið svif­ryk þrátt fyrir rykbindingu

Styrkur svonefnds PM10-svifryks mældist hár í loftgæðamælistöðum í borginni í morgun. Gildið nálgaðist að vera tvöfalt yfir heilsuverndarmörkum fyrir heilan sólarhring á hádegi.

Rykið kemur frá umferð en veðuraðstæður valda því að það þyrlast upp af þurrum götum og helst á lofti, að því er segir í tilkynningu frá Reykjavíkurborg. Rykbinding sem ráðist var í aðfararnótt miðvikudags er það sögð duga skammt til vegna aðstæðna.

Afar þurrt hefur verið í veðri á höfuðborgarsvæðinu um margra vikna skeið og ekki er útlit fyrir vætu fyrr en um miðja næstu viku. Því segist borgin ætla að skoða frekari rykbindingu til að draga úr mengun. Rykbindingin er sögð samvinnuverkefni borgarinnar og Vegagerðarinnar.

Á meðan mengun er svo mikil beinir borgin því til aldraðra, barna og þeirra sem eru viðkvæmir fyrir í öndunarfærum að forðast útivist í lengri tíma og takmarka áreynslu. Einnig hvetur hún almenning til að draga úr notkun einkabílsins og fyrirtæki til að hvetja starfsfólk sitt til að vinna fjarvinnu á svifryksdögum.