„Ég skil ekki hvernig fólk getur skrifað svona“

Gullverðlaunin í sprettgöngu kvenna fóru til Linn Svahn, silfrið til Jonnu Sundling og bronsið til Maju Dahlqvist. Á áhorfendapöllunum fékk Karl Gústaf konungur því að upplifa sögulegan dag í sænskum skíðagöngum.

En þegar sænski þjóðsöngurinn ómaði yfir Ólympíuleikvanginn var dagurinn fyrir löngu búinn að taka hörmulega stefnu fyrir fjórðu konuna í sænska liðinu.

Tárin streymdu

Tárin streymdu þegar Johanna Hagström var í viðtali við norska sjónvarpið. Ekki vegna þess að það væru mikil vonbrigði að falla úr leik í átta manna úrslitum, heldur vegna þess sem mætti henni þegar hún leit á símann sinn.

„Þegar maður situr og reynir að melta það að maður sé dottinn út, þá er ljóst að ég hef fengið mörg falleg skilaboð. En ég renndi snöggt yfir og sá athugasemd á Instagram sem birtist sem ég vildi alls ekki sjá,“ segir Johanna Hagström við norska ríkisútvarpið, greinilega snortin.

Hagström sagði frá nokkrum niðrandi skilaboðum eftir að hún féll úr leik í sprettgöngu Ólympíuleikanna.

Fólk hugsar ekki áður en það skrifar

Hagström segir að hún hafi ekki upplifað mörg svipuð tilvik sjálf en viti að aðrir hafi gert það.

„Fólk hugsar ekki áður en það skrifar og á að hafa svo margar skoðanir á hlutunum, og það skil ég ekki. Maður á að halda því fyrir sjálfan sig. Það má hafa skoðun, en maður þarf ekki að skrifa hana. Ég skil ekki hvernig fólk getur skrifað svona,“ sagði Hagström.

Í samtali við sænska ríkisútvarpið sagði hún að athugasemdin hafi snúist um valið í sprettgöngu Ólympíuleikanna.

Ég veit að ég á þetta sæti skilið

„Ég veit að ég á þetta sæti skilið, en það voru nokkrar athugasemdir um að Emma (Ribom) hefði sko ekki dottið út í átta manna úrslitum,“ útskýrir hún.

„Mér finnst þetta alveg rangt. Þetta á ekki heima neins staðar. Það hefði alveg eins getað verið Johanna sem stæði hér með verðlaun,“ segir Maja Dahlqvist, liðsfélagi Hagström, með bronsverðlaun um hálsinn.

Barist fyrir þessu í fjögur ár

Landsliðsþjálfari Svía, Anders Byström, segir að hans ráð sé að íþróttafólkið fylgist ekki með því sem er skrifað til þess á stórmóti. Samt sem áður sættir hann sig ekki við það sem Hagström upplifði.

„Maður verður að hugsa um að þessir íþróttamenn hafa barist fyrir þessu í fjögur ár og svo fær maður svona endi, þá á maður ekki að strá meira salti í sárið. Það eru mörg nettröll sem sitja þarna,“ sagði Byström við NRK.