Þetta kemur fram í frétt belgíska miðilsins Nieuwsblad. Níu Íslendingar voru um borð í vélinni sem var á leið frá Brussel til Kaupmannahafnar.

„Þetta hefði getað endað með hörmulegum afleiðingum,“ segir Luk De Wilde flugmálasérfræðingur í samtali við belgíska miðilinn. Atvikið sé mjög óvenjulegt og flugmennirnir hafi naumlega komið í veg fyrir að illa færi.

Farþegi lýsti því í samtali við fréttastofu í dag hvernig farþegaþotan hafnaði á grasi eftir misheppnaða tilraun til flugtaks. Alls voru 165 farþegar um borð og átti atvikið sér stað um klukkan 22 á staðartíma í gær.

„Eftir smá tíma byrjar hún að negla niður því hún er augljóslega að hætta við flugtakið. Það er látið reyna á allar bremsur vélarinnar þannig að hún hristist öll og skelfur, og færist aðeins til,“ sagði Finnur Geir Beck, framkvæmdastjóri Samorku, sem var nokkuð brugðið. Flugstjórinn hafi svo greint farþegum frá því að ástæðan fyrir nauðhemluninni hafi verið að vélin hafi verið á rangri flugbraut.

Ariane Goossens, talskona Brussel-flugvallar, segir að flugvélin hafi byrjað flugtak sitt á akbraut í stað flugbrautar. „Akbrautin er eingöngu notuð til að færa flugvélar á milli flugstöðvarinnar og flugbrautarinnar.“

Þotan átti upphaflega að leggja af stað til Kaupmannahafnar klukkan 20:30 en var seinkað um níutíu mínútur. Klukkan 22:04 að staðartíma í Brussel fór þotan loks frá flugstöðinni með áðurnefndum afleiðingum.

Alvarleg mistök

„Það hefði tekið flugvélina í mesta lagi þrjár eða fjórar sekúndur í viðbót til að ná þeim hraða sem hefði þurft til að taka á loft,“ segir Luk De Wilde í samtali við Nieuwsblad. Hann telji að akbrautin sé of stutt til að ná flugtaki og atvikið getað endað með ósköpum. De Wilde segir allt benda til þess að flugstjóri og aðstoðarflugmaður hafi þarna gert alvarleg mistök.

„Í hverri flugferð fljúga flugmennirnir tveir „hver fyrir sig“. „Það er ákveðið fyrir fram hver flýgur og hver hefur eftirlit,“ segir De Wilde. „Annar flýgur í raun og veru og stjórnar stjórntækjum en hinn heldur sambandi við flugumferðarstjórn og fylgist með kortum og flugleiðum. Að hvorugur þeirra hafi tekið eftir því að þeir voru á akbrautinni, en ekki flugbrautinni, er sannarlega merkilegt og einstakt.“

Ekki leyft að fara í flugstjórnarklefa á næstunni

Í frétt Nieuwsblad er greint frá því að út frá samskiptum flugmannanna við flugumferðarstjórn virðist þeir hafa áttað sig á mistökunum rétt í tæka tíð. De Wilde fullyrðir að umrædd flugbraut sé ekki reglulega notuð á flugvellinum en hafi verið oftar fyrir valinu síðustu vikur vegna vindáttar.

„Þekktu flugmennirnir ekki þessa flugbraut og gerðu því mistök? Spilaði tímapressa einnig þátt þar sem búið var að seinka flugtaki? Rannsókn þarf nú að leiða það í ljós. Ég geri ráð fyrir að báðir flugmennirnir verði sendir í leyfi á meðan rannsókn stendur yfir. Hvorugum þeirra verður leyft að fara aftur í stjórnklefann á morgun eða í næstu viku. Þetta er alvarlegt atvik.“

Atvikið er nú til rannsóknar hjá belgískum samgönguyfirvöldum.