Rann­sókn á andlátinu hófst eftir til­kynningu starfs­manns

Samkvæmt heimildum fréttastofu hóf lögreglan rannsókn á andlátinu eftir að tilkynning barst frá öðrum starfsmanni hjúkrunarheimilisins í kjölfar lyfjagjafar. Við förum ítarlega yfir málið í kvöldfréttum.

Við verðum í beinni frá bráðamóttöku Landspítalans þar sem minnst átta hafa smitast af berklum. Við ræðum við lækni um stöðuna.

Sonur norsku krónprinsessunnar neitaði fyrir dómi í dag að hafa framið alvarlegustu ofbeldisbrotin sem hann er ákærður fyrir eins og nauðgun og líkamsárás. Sérfræðingur um konungleg málefni segir hneykslið alvarlegt. Krúnan sjálf gæti verið í hættu.

Þá förum við yfir efnahagsmálin. Í fyrramálið mun peningastefnunefnd Seðlabanka Íslands kynna ákvörðun sína. Hagfræðingur sem fréttastofa ræðir við segir að það sé langt í að vextir verði lækkaðir að nýju.

Þá verðum við í beinni útsendingu úr ráðhúsinu með borgarstjóra sem skýrir fyrirætlanir um að gera strætó endurgjaldslausan fyrir börn. Við sýnum frá skoplegu atviki sem átti sér stað í þingsal þegar grínpersóna úr Fóstbræðrum kom þingheimi til að skella duglega upp úr.

Í sportpakkanum verður rætt við formann HSÍ sem segir vinnu nú þegar hafna til að koma í veg fyrir annað eins áhorfendaleysi á úrslitahelgi næsta stórmóts, þegar strákarnir okkar fara á HM í Þýskalandi.

Þá verðum við á menningarlegum nótum í Íslandi í dag.

Glænýja íslenska leikverkið Ormstunga hefur fengið góðar undirtektir síðan það var frumsýnt fyrir rúmlega viku. Um er að ræða óperu, rapp, söngleik sem byggir á Gunnlaugs sögu ormstungu. Ungt fólk á þrítugsaldri er í algjöru aðalhlutverki í uppsetningunni en við ræðum við ungu höfundana sem strituðu í sex ár til að gera þetta að raunveruleika. Við ræðum einnig við unga leikara í þremur stærstu hlutverkunum og Jóa Pé sem var tónlistarstjóri.