„Svo kemur pabbi í heim­sókn þegar þarf að vinna ein­hver flókin verk­efni“

Í kaffispjalli um helgar er rætt við fólk í ólíkum störfum. Við spyrjum alltaf um hvenær fólk vaknar á morgnana, hvað það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Vekjaraklukkan hringir yfirleitt um klukkan 6:40. Ég snúsa hana einu sinni til tvisvar og er því almennilega vaknaður um klukkan 6:53.“

Hvað er það fyrsta sem þú gerir á morgnana?

„Ég byrja á að teygja mig í símann og athuga hvort ég hafi fengið einhverja tölvupósta frá því að ég sofnaði og svara þeim ef einhverjir eru. Svo renni ég yfir helstu fréttir og kíki á samfélagsmiðla. 

Ef ég er vel upplagður þá skelli ég mér í íþróttagallann og fer í ræktina og gufu. Ef það er einhver leti í mér þá tek ég slurk í heimilisstörfunum og fer svo í vinnuna.“

Hvaða heimilistörfum ertu stoltastur af að sinna?

„Þegar stórt er spurt... 

Ég held að ég verði bara að vera hreinskilinn og viðurkenna að ég er ekkert sérstaklega stoltur af neinum heimilisstörfum. 

Ég fæ stundum aðstoð við þrifin og svo kemur pabbi í heimsókn þegar þarf að vinna einhver flókin verkefni. 

Ég er samt lunkinn málari og er óhræddur við að grípa í pensilinn þegar það þarf að mála.“

Í hvaða verkefni ertu að vinna helst þessa dagana?

„Helsta verkefnið þessa dagana sem aðra er að selja fasteignir og ná í ný verkefni fyrir Valhöll. Árið fer vel af stað og það er mikið um sölur og verðmæti ásamt því að það eru margar nýjar eignir að koma í sölu. 

Svo er ég að skipuleggja „Kick-Off“ dag Valhallar en það er dagur þar sem starfsfólk fasteignasölunnar hittist í skemmtilegu umhverfi og við fræðumst um málefni tengd okkar störfum og svo gerum við vel við okkur í mat og drykk. 

Þá var nýr starfsmaður að hefja störf hjá okkur og er ég að reyna koma henni vel inn í starfið.“

Hvernig skipuleggur þú þig í vinnu?

„Yfirleitt eru verkefnin ansi mörg sem ég þarf að leysa á degi hverjum og því nauðsynlegt að skipuleggja sig vel. 

Ég er algjör „to do“-listamaður. 

Þegar ég mæti í vinnuna á morgnanna þá skrifa ég niður þau verkefni sem eru fram undan yfir daginn og hefst svo handa við að leysa þau eitt af öðru. 

Eðli starfsins er samt þannig að nánast undantekningarlaust koma upp ófyrirséð verkefni sem þarf að leysa strax og þá á skipulagið til að riðlast. Það er nánast regla að ég næ ekki að klára öll þau verkefni sem ég ætlaði að ljúka yfir daginn og því eiga verkefnin til að birtast aftur á „to do“-lista næsta dags.“

Hvenær ferðu að sofa á kvöldin?

„Ég er yfirleitt kominn upp í rúm um klukkan tíu. Þá byrja ég kannski að horfa á þátt eða mynd eða gríp í bók. Svo reyni ég að vera sofnaður um klukkan hálf tólf þó að það dragist stundum aðeins.“