PGA-mótaröðin endur­heimtir helsta skúrkinn af LIV

Vistaskipti Reed báru nokkuð brátt að. Hann greindi frá því eftir að hann sigraði á móti á evrópsku mótaröðinni í Dúbaí um helgina að hann væri ekki búinn að endurnýja samning sinn við LIV. Á miðvikudag var svo upplýst að Reed sneri ekki aftur á LIV-mótaröðina.

Þess í stað spilar Reed á DP-mótaröðinni evrópsku á þessu ári. Hann verður gjaldgengur á PGA-mótaröðinni aftur á næsta tímabili sem hefst í haust.

„Ég er spenntur að tilkynna að ég snýr aftur á PGA-mótaröðina sem fyrrverandi sigurvegari tímabilið 2027 og að ég er gjaldgengur til að byrja að keppa í PGA-mótum seinna á þessu ári,“ sagði Reed í færslu á samfélagsmiðlum þar sem hann tilkynnti um ákvörðun sína.

LIV staðfesti brotthvarf Reed og sagði að samningar hefðu ekki náðst á milli þeirra. Reed var einn fyrstu kylfinganna sem tóku boði Sádiaraba sem stofnuðu LIV um gull og græna skóga árið 2022.

Uppfyllir ekki sömu skilyrði og Koepka

PGA-mótaröðin bauð þröngum hópi LIV-kylfinga upp á tímabundna leið til að snúa aftur á sama tíma og hún tók við Brooks Koepka, fimmföldum risamótssigurvegara, fyrr í þessum mánuði. Sú leið var klæðskerasniðin að stærstu stjörnum LIV: Bryson DeChambeau, Jon Rahm og Cameron Smith.

Enginn þeirra hefur enn þekkst boðið og hafa þeir allir sagst ætla að halda kyrru fyrir á LIV sem stendur.

Reed uppfyllti ekki skilyrðin í tilboði PGA-mótaraðarinnar. Í yfirlýsingu PGA-mótaraðarinnar sagði að Reed hefði sagt upp aðild sinni að mótaröðinni áður en hann gekk til liðs við LIV. Hann hefði því ekki brotið reglur mótaraðarinnar, ólíkt mörgum öðrum þeirra sem sviku lit.

Þannig öðlist Reed aftur keppnisrétt ári eftir síðasta LIV-mótið sem hann keppti á. Frá 25. ágúst geti hann þannig keppt í mótum með þvi að vinna sér sæti í þeim eða þiggja boð frá styrktaraðilum þeirra. Á næsta ári geti hann sótt aftur um fulla aðild að mótaröðina og fengi keppnisrétt sem fyrrum meistari.

Ásakanir um svindl, nafnlaust níð og rýtingsstungur í bakið

Reed er einn umdeildasti kylfingur síðari ára og er ekki ýkja vinsæll á meðal annarra kylfinga. 

Hann hefur ítrekað verið vændur um svindl á golfvellinum og eiginkona hans, sem hefur einnig verið kylfusveinn hans, var sögð stýra nafnlausum Twitter-reikningi sem skaut oft fast á ætlaða óvildarmenn Reed, PGA-mótaröðina og fleiri. Þá er á allra vitorði deilur hans við fjölskyldu sína sem leiddu til þess að hann sleit öll tengsl við foreldra sína.

Á tímabili var Reed þekktur sem „Captain America“ fyrir vasklega framgöngu í Ryder-bikarnum, sérstaklega eftir eftirminnilegt einvígi við Rory McIlroy á Hazeltine-vellinum árið 2016.

Eftir slæma útreið Bandaríkjanna tveimur árum síðar vakti Reed litla kátínu á meðal félaga sinna og liðsstjóra með því að gagnrýna allt og alla, nema sjálfan sig, í viðtali á meðan kampavín sigurreifra Evrópumannanna var enn kalt og freyðandi.

Reed stefndi síðan manni og öðrum eftir að hann gekk til liðs við LIV, þar á meðal nokkrum fjölmiðlamönnum fyrir meint meiðyrði í sinn garð, og krafðist milljarða króna í miskabætur. Málaferli hans urðu til þess að McIlroy þurfti að taka á móti stefnu heima hjá sér á jólunum, nokkuð sem féll ekki sérlega vel í kramið hjá Norðuríranum.

Framtíð LIV?

Margir velta fyrir sér framtíð LIV-mótaraðarinnar eftir brotthvarf Koepka og Reed. Eftir að hafa valdið uppnámi í golfheiminum með því að stela nokkrum af stærstu stjörnum golfsins af PGA-mótaröðinni árið 2022 hefur hún skilað sádiarabískum eigendunum litlum árangir.

Fáir mæta á LIV-mót, utan Ástralíu og Suður-Afríku, og sjónvarpsáhorf nálgast ekki einu sinni að vera hálfdrættingur á við PGA-mótaröðina. LIV hefur heldur ekki tekist að laða nýja stjörnu til sín frá því að Jon Rahm skipti óvænt yfir árið 2023.

Ekkert hefur orðið úr samruna LIV og PGA sem tilkynnt var um sumarið 2023 og loforð Donalds Trump Bandaríkjaforseta um að hann kæmi á sættum hafa dagað uppi. Forsetinn sjálfur kvartar væntanlega ekki sjálfur því í ár keppa báðar mótaraðir á völlum í hans eigu í fyrsta skipti, hvort sem það er tilviljun eða ekki.

Nú virðist fjara hratt undan LIV á meðan PGA-mótaröðinni vex ásmegin. Ekki liggur fyrir hvort að Sádarnir ætli að bregðast við með því að taka upp veskið á ný en svo virðist sem þeir hafi frekar unnið að því að draga saman seglin að undanförnu.