Náðu loksins Ólympíufaranum á lista FBI yfir hættu­legustu glæpa­mennina

Þar með lýkur margra ára leit að hinum 44 ára gamla manni sem er sakaður um að stýra alþjóðlegum fíkniefnasamtökum.

Wedding er ákærður fyrir að hafa yfirumsjón með starfsemi glæpasamtaka og fyrir að hafa fyrirskipað fjölda morða, þar á meðal skotárás sem leiddi til dauða alríkisvitnis í janúar síðastliðnum.

Wedding, sem keppti á Vetrarólympíuleikunum 2002, var tekinn höndum á fimmtudagskvöld í Mexíkóborg og var fluttur til Bandaríkjanna, að sögn Kash Patel, forstjóra FBI, bandarísku alríkislögreglunnar, á föstudag.

Patel ræddi á blaðamannafundi í Ontario í Kaliforníu og lagði áherslu á samstarf stofnana í mörgum löndum við að handsama Wedding, sem hann kallaði „einn hættulegasta glæpamann heims“. FBI hafði gefið leitinni að Wedding og samverkamönnum hans nafnið „Aðgerð stórsvig“.

Meira en 2.300 kíló af kókaíni

Wedding var sakaður um að stýra fíkniefnasölu þar sem Los Angeles var aðaldreifingarstaður, að sögn Jim McDonnell, lögreglustjóra í Los Angeles. 

Hann sagði að yfirvöld í málinu hefðu lagt hald á meira en 2.300 kíló af kókaíni, 44 kíló af metamfetamíni, 44 kíló af fentanýli, átta skotvopn og yfir 55 milljónir dala í „ólöglegum eignum“.

„Saman höfum við rofið stóra fíkniefnaleið sem hafði áhrif á Los Angeles, Bandaríkin og Kanada,“ sagði McDonnell á blaðamannafundinum, þar sem fulltrúar frá lögregluyfirvöldum í Bandaríkjunum og Kanada voru viðstaddir. Yfirvöld lögðu einnig áherslu á samstarf við aðila í Mexíkó, Kólumbíu og Dóminíska lýðveldinu.

Wedding var fyrst ákærður í júní 2024 fyrir ýmis brot tengd kókaínsmygli og morðum. Hann var settur á lista FBI yfir 10 eftirlýstustu flóttamenn í mars.

Í nóvember leiddi opinberuð ákæra kviðdóms í ljós að Wedding stæði frammi fyrir ákærum tengdum skotárás sem leiddi til dauða alríkisvitnis í Kólumbíu í janúar síðastliðnum. 

Líkt við „El Chapo“ og Pablo Escobar

Á blaðamannafundi í nóvember báru bandarískir og kanadískir embættismenn Wedding saman við alræmda eiturlyfjabaróna eins og Joaquin „El Chapo“ Guzman og Pablo Escobar. Pam Bondi, dómsmálaráðherra Bandaríkjanna, sagði þá að starfsemi Weddings hefði skilað meira en einum milljarði dala á ári í ólöglegum fíkniefnatekjum. Hann var einnig sagður hafa unnið með hinu valdamikla Sinaloa-glæpagengi í Mexíkó, að sögn Bondi og Patel.

Þar sem Wedding gekk enn laus hækkaði FBI verðlaunafé fyrir upplýsingar um hvar hann væri niðurkominn úr tíu milljónum dala í fimmtán milljónir dala í nóvember en það gera rúma 1,8 milljarða íslenskra króna.

„Þetta er stór dagur fyrir öruggari Norður-Ameríku og heiminn, og skilaboð um að þeir sem brjóta lög okkar og skaða borgara okkar verði dregnir til ábyrgðar,“ skrifaði Patel á X á föstudag. Bondi tilkynnti einnig um handtökuna á X.

Keppti á Ólympíuleikunum 2002

Ryan Wedding er fyrrverandi ólympíufari á snjóbretti. Hann keppti fyrir hönd Kanada á Vetrarólympíuleikunum í Salt Lake City 2002 samhliða stórsvigi karla. Wedding féll þá úr keppni í undankeppninni í samhliða stórsvigi.

Eftir Ólympíuleikana er hann sagður hafa orðið alþjóðlegur eiturlyfjasali og skipulagt morð á ýmsum vitnum. Þann 6. mars 2025 var honum bætt á lista bandarísku alríkislögreglunnar, FBI, yfir tíu hættulegustu glæpamennina sem ganga lausir.