Ríkis­stjórn Gabon setti fótboltalandsliðið sitt í bann

Það var ekki gefið upp hversu bannið verður langt en það má búast við því að það verði ekki svo langt að landsliðið detti út á komandi mótum.

Gabon féll úr leik í riðlakeppninni. Liðið tapaði öllum leikjum sínum á móti Kamerún (0-1), Mosambík (2-3) og Fílabeinsstöndinni (2-3). Öll hin þrjú liðin komust áfram í sextán liða úrslitin.

Fyrirliðinn Bruno Ecuele Manga og Pierre-Emerick Aubameyang hafa einnig verið settir í bann frá því að spila aftur fyrir landsliðið sitt.

Aubameyang er markahæsti leikmaður landsliðsins frá upphafi með 40 mörk í 86 leikjum en Manga er sá leikjahæsti með 118 leiki frá 2006 til dagsins í dag.

Gabon er í 78. sætinu á styrkleikalista Alþjóða knattspyrnusambandsins eða fjórum sætum neðar en Ísland.

Landsliðið komst ekki á Afríkumótið fyrir tveimur árum en fór í sextán liða úrslitin árið 2021.

Liðið komst ekki áfram í undankeppni HM 2026, komst í umspilið en tapaði þá 4-1 á móti Nígeríu í undanúrslitunum og var þar með úr leik.

Gabon hefur aldrei komist í úrslitakeppni HM en besti árangur landsliðsins á Afríkumótinu eru átta liða úrslitin en þangað komst Gabon 1996 og 2012.