„Ég verð að segja að ég er svo­lítið hlessa“

Líkt og fjallað var um í dag taldi Hæstiréttur að tilteknir skilmálar Landsbankans í tveimur lánasamningum hafi verið ólögmætir en að ekkert tjón hefði hlotist vegna þeirra. Því var Landsbankinn sýknaður af öllum kröfum neytenda.

Breki segir þá niðurstöðu í takti við það sem Neytendasamtökin lögðu upp með, að því leytinu til að skilmálarnir hafi verið dæmdir ólögmætir.

Stór breyting

Í dómunum tveimur segir að skilmálarnir hafi heimilað bankanum að breyta vöxtum í samræmi við vaxtaákvarðanir hans á hverjum tíma.

„Það var það sem við lögðum upp með, að bönkunum verður ekki lengur heimilt að breyta vöxtum eftir hentisemi, nánast, heldur verði skilmálarnir að vera skýrir, aðgengilegir og útskýranlegir fyrir venjulegum neytanda. Auðvitað er það stór breyting en við erum svolítið hvumsa yfir því að bönkunum hafi verið, Landsbankanum í þessu tilviki, hafi verið heimilt að beita skilmálunum, eins og hann gerði og án þess að það hafi hlotist neitt tjón af. Svona í fljótu bragði þá er bara ósammála því.“

Leggjast yfir dómana ásamt jólabókunum

Breki segir að hann og lögmenn Neytendasamtakanna muni nú leggjast yfir dómana, ásamt jólabókunum. 

„Þetta verður kannski aðallesturinn yfir hátíðirnar og svo sjáum við til strax í byrjun næsta árs hvað við gerum.“

Hann bendir á að í gengislánamálunum svokölluðu á sínum tíma hafi þurft að höfða tugi mála áður en niðurstaða náðist neytendum í hag. Hann voni að ekki muni þurfa að koma til þess. Neytendasamtökin muni á nýju ári ræða við alla bankana og sjá hvernig þeir munu bregðast við dómunum.