Svona svara stjórn­völd á­kalli um bundið slit­lag á sveita­vegi

Í fréttum Sýnar mátti sjá hvar á landinu megi búast við vegarbótum af þessu tagi en flestir aðalvegir á þjóðvegakerfinu er núna komnir með bundið slitlag.

Annað gildir þegar beygt er inn á sveitavegina. Þar taka oftar en ekki við holóttir og mjóir malarvegir sem verða aurugir í vætutíð en stór hluti íslenskra sveita býr enn við þannig vegi. En hyggst ríkisstjórnin með samgönguáætlun gera átak í sveitavegunum?

„Já, við erum… tengivegirnir. Það er… við erum bara að vinna stöðugt í því,“ svarar Eyjólfur Ármannsson innviðaráðherra.

En hvar á að bæta úr?

„Það er vegurinn um Vatnsnes og Bárðardal vestri sem á að fara í framkvæmdir á. Og svo eru að sjálfsögðu líka fleiri framkvæmdir. En tengivegirnir skipta orðið mjög miklu máli,“ segir ráðherrann.

Bárðardalur vestri fær reyndar bara slitlag á þriggja kílómetra kafla næstu fimm árin en svo meira síðar á árunum 2031 til 2040.

Vatnsneshringurinn verður í sérflokki í vegarbótum sveitavega næsta áratuginn en endurbygging vegarins þar mun dreifast á tímabilið 2027 til 2035. Af öðrum vegarköflum norðan og vestanlands, sem vænta mega slitlags á næstu fimm árum, má nefna Laxárdal, Víðidal, Vatnsdal, Skagaveg, Sæmundarhlíð, Hegranes og Svarfaðardal.

En það verða víða vonbrigði. Þannig virðist lítið eiga að bæta sveitavegi í Dalabyggð, nema þá helst veginn um Skógarströnd og Strandamenn fá bara slitlag á stuttan kafla í sunnaverðum Steingrímsfirði. Á Vestfjörðum er stefnt á að leggja bundið slitlag á veginn niður á Rauðasand.

Á Austurlandi verður haldið áfram að leggja bundið slitlag á Efri-Jökuldal í átt að Stuðlagili. Austfirðingar spyrja hins vegar um Axarveg á leiðinni milli Djúpavogs og Egilsstaða.

„Við stefnum á að fara í hann. Það er gríðarlega mikilvæg framkvæmd,“ segir Eyjólfur.

Það verða reyndar bara teknir tíu kílómetrar á veginum um Öxi á árunum 2027 til 2029, sennilega á kaflanum næst Skriðdal. Meginhluti Axarvegar verður hins vegar ekki byggður upp fyrr en á árunum 2031 til 2035, samkvæmt samgönguáætlun.

Suðaustanlands er áformað að leggja slitlag á veginn um Meðalland.

Sunnlendingar losna við nokkra malarkafla á næstu fimm árum, eins og á Önundarholtsvegi í Flóa, Urriðafossvegi, Einholtsvegi, á Hagabraut, á Rangárvöllum, í Landeyjum og á Skálavegi undir Eyjafjöllum.

„Og ég heyrði það á innviðafundunum í ágúst að það er mikið ákall um það í dreifbýli að fá bundið slitlag á sveitavegina,“ segir innviðaráðherrann.

Samkvæmt upplýsingum Guðmundar Vals Guðmundssonar, framkvæmdastjóra þróunarsviðs Vegagerðarinnar, má gera ráð fyrir að á næstu fimm árum verði lagt bundið slitlag 155 kílómetra af tengivegum og 57 kílómetra af stofnvegum þannig að malarköflum fækki á þessu tímabili um alls 212 kílómetra.

Það verður samt enn nóg eftir. Núna er búið að leggja bundið slitlag á sexþúsund kílómetra eða 46 prósent ef þrettán þúsund kílómetra löngu þjóðvegakerfi Íslands. Sjö þúsund kílómetrar eru enn malarvegir.