Ragn­hildur nýr fram­kvæmda­stjóri Píeta sam­takanna

Í tilkynningunni segir að stjórnunarstíll Ragnhildar hafi einkennst af hugmyndafræðinni um þjónandi forystu og hefur hún mikla þekkingu á félagsstarfi og grasrótarhreyfingum, einkum þar sem hún starfaði fyrir KFUM og KFUK og tengd félög. Þá gegndi hún stöðu framkvæmdastjóra Hins íslenska Biblíufélags um skeið, í kringum 200 ára afmæli félagsins.

Ragnhildur starfaði einnig um tíma sem skólastjóri Barnaskólans í Reykjavík og djákni innan Þjóðkirkjunnar. Haft er eftir Ragnhildi í tilkynningu að hún hlakki til að taka við framkvæmdastjórastöðu Píeta samtakanna og vinna með því góða fólki sem þar starfi ásamt öllu því fólki sem leggi hönd á plóg í sjálfboðavinnu fyrir samtökin.

,,Píeta samtökin gegna mjög mikilvægu hlutverki í forvarnarstarfi gegn sjálfsvígum og sinna viðtölum og stuðningi við fólk um land allt. Samtökin eru tíu ára á næsta ári, þau hafa skapað sér velvild og jákvæðni í þjóðfélaginu sem gott er að byggja á til framtíðar. Það skiptir miklu máli að við stöndum vel að forvörnum hvað varðar sjálfsvíg og að þjóðfélagið allt taki höndum saman um að hlúa að ungu fólki og taka utan um það.‘‘

Í tilkynningunni segir ennfremur að Hjálmar Karlsson formaður Píeta samtakanna auk stjórnar hlakki til að fá reynslumikla manneskju í framkvæmdastjórastöðuna og að sjá samtökin vaxa og dafna undir stjórn Ragnhildar. Á sama tíma hlúa að þeirri kjarnastarfsemi sem er gagnreynd meðferð til þeirra sem eru í sjálfsvígshættu eða með sjálfskaðandi hugsanir ásamt viðtölum og stuðningi við aðstandendur þeirra og fjölskyldur þeirra sem hafa misst ástvin í sjálfsvígi.

Píeta veitir meðferð fyrir fólk með sjálfsvígshugsanir og/eða sjálfsskaða, viðtöl og stuðning við aðstandendur þeirra og aðstandendur sem hafa misst. Þjónustan er fyrir 18 ára og eldri og er gjaldfrjáls.

Minnt er á í tilkynningu að hjálparsími Píeta 552 2218 sé ávallt opinn, allan sólahringinn, alla daga ársins. Það sé alltaf von og það sé hjálp að fá.