Jóla jóla stemningin: Elsti í heiðurshópnum 90 ára

Og skælbrosir.

Því já; aðventan er svolítið sá tími þar sem vinnustaðir virkilega vinna að því að efla og gleðja, skapa stemninguna í vinnunni þannig að jólin svífi yfir, þótt það sé álag.

Hjá Nóa Síríus er meira að segja unnið að því að möndlulyktin taki á móti fólki og er þá ótalið ljúffenga heita súkkulaðið sem einn starfsmaðurinn í húsi býr víst svo snilldarlega til, eða allar skemmtanirnar og viðburðirnir sem starfsfólkið og vinnan nýtur saman í aðdraganda jóla.

Leikir, keppnir, verðlaun og alls kyns gaman.

„Stærsta tilhlökkunin er samt alltaf hádegið með okkar heiðursfólki,“ segir Harpa og útskýrir að þar eigi hún við um tugi starfsmanna sem þegar hafa látið af störfum hjá fyrirtækinu sökum aldurs, sá elsti nú 90 ára.

Í þessari og næstu viku mun Atvinnulífið heimsækja vinnustaði og fá að heyra um jólastemninguna á aðventunni. Fyrsta heimsóknin er Nói Síríus.

Nýjar og gamlar venjur

Hjá Nóa Síríus starfa um 120 manns í dag af 15 þjóðernum. Íslendingar eru um 60% starfsfólks en 40% er fólk frá öðrum þjóðernum, sem Harpa segir líka óskaplega skemmtilega blöndu fyrir vinnustaðinn.

„Við gerum þetta til dæmis þannig að á þjóðhátíðardegi hvers og eins, er einhver matur í hádeginu frá því landi,“ segir Harpa og útskýrir að svo heppin séu þau að í fyrirtækinu starfar snilldarkokkur í mötuneytinu sem eldar ofan í þau.

Hvort sem það eru framandi þjóðlegir réttir í samstarfi við starfsfólk erlendis frá, eða til að elda allan ljúffenga íslenska matinn sem við kennum við jól og aðventu.

„Það er auðvitað ákveðinn lúxus að hafa okkar eiginn kokk og auðvitað eru sumir sem koma með sitt eigið nesti og allt það. Hádegið er samt þessi mikilvæga samvera þar sem við styrkjum tengslin, þetta eru stundirnar þar sem við erum að spjalla saman án þess að vera að tala um vinnuna og svo framvegis,“ segir Harpa og viðurkennir að henni finnist hún oft upplifa missi ef eitthvað verður til þess að hún nær ekki að kíkja í hádegið á vinnustaðnum til að heilsa upp á og hitta sitt fólk.

„Bara til dæmis áðan var ég að ræða við eina sem hefur starfað hérna í 39 ár og hlakkar svo til að halda upp á sitt fertugasta ár á næsta ári!“ segir Harpa og brosir.

Sem er fínt að hún minnist á, því eitt af því sem einkennir starfshóp Nóa Síríus er hár starfsaldur.

Í rótgrónu fyrirtæki sem þessu, hafa þær því verið þó nokkrar kynslóðirnar sem hafa starfað um árabil, oft marga áratugi og jafnvel alla sína starfsævi hjá fyrirtækinu.

„Það er ómetanlegt að fá að kynnast þessi fólki,“ segir Harpa og lýsir því hvernig jólahlaðborðið með heiðursfólkinu sé þannig uppsett að hádegið er aðeins lengra en venjulega og fyrir þennan dag hefur verið unnið að því að ná í sem flesta eldri starfsmenn sem látið hafa af störfum sökum aldurs.

„Sem getur alveg verið heilmikil vinna líka,“ segir Harpa og brosir.

Enda ekki allir á hópnum á Facebook eða vanir því að nota gömlu góðu landlínuna frekar en gsm.

Harpa segir þennan sið hafa verið um árabil hjá fyrirtækinu. Þetta sé eitt af því sem hún heyrði af einna fyrst eftir að hún byrjaði sjálf hjá fyrirtækinu fyrir nokkrum árum síðan og eitt af því sem sé svo yndislegt við þetta, sé að þetta sé árleg hefð sem öllum finnist einhvern veginn svo vænt um.

Að fá tækifæri til að hitta hópinn, kynnast þeim og spjalla. 

Gefa þeim jólanammikassann okkar góða og í raun láta vita að auðvitað tilheyra þau enn hópnum þótt þau séu ekki lengur að vinna með okkur.“ 

Stemningin í kringum baksturinn

Það veit það hvert mannsbarn á Íslandi að auðvitað er desember mánuður álagstími hjá fyrirtæki eins og Nóa Síríus. Enda einfaldlega staðreynd að konfektmolar Nóa Síríus eru nánast partur af DNA-inu okkar; hver hefur ekki skoðanir á því hvaða moli er bestur?

Í jólaboðum geta meira að segja verið skiptar skoðanir á molum, svo ekki sé talað um umræðurnar um nýju molana. Þar sem sitt sýnist hverjum og allt það…

En álagið snýst um meira en framleiðsluna sem þarf öll að vera hin mesta fyrir jólin sjálf, því Harpa segir þeirra vertíð í raun hefjast á jólabakstrinum.

„Þess vegna má segja að jólagleðin okkar hefjist líka hér innanhúss með bakstri því það sem í raun hefur okkar jóladagskrá er bökunarkeppni starfsmanna.“

Sem er engin smá!

„Kosningar eru leynilegar og dómnefnd er fengin til að smakka. Þannig að þetta er allt mjög alvöru,“ segir Harpa og brosir.

„Og síðan gefum við út þessar uppskriftir fyrir okkar fólk. Þannig að þótt margir tengi okkur við veglega uppskriftarbæklinga sem Nói Síríus hefur margsinnis gefið út, er ekkert minni metnaður settur í þá keppni sem hér fer fram innandyra.“

Sem fjölskyldusamverustundir er boðið upp á piparkökumálun sem fer fram um helgi og er óskaplega skemmtileg samverustund.

„Síðan förum við alltaf á eina fjölskyldusýningu í bíó,“ segir Harpa um viðburðinn sem fólkið innanhúss talar almennt um sem jólabíóið.“

Ljóta jólapeysuþemað er auðvitað þekkt sem skemmtilegur viðburðardagur, síðan er fenginn Möndlubás til að leyfa ilminum af ristuðum möndlum að fylla öll vit og þá á eftir að nefna kaffistundina með góða heita súkkulaðinu.

Sem augljóslega er svo gott að það er varla að Harpa hafi nægilega sterk lýsingarorð til að lýsa því.

„Það er bara ein hérna sem er viðskiptastjóri sem býr til svo svakalega gott heitt súkkulaði að hún sér um þetta,“ segir hún svo íbyggin á svip.

Svona eins og hún sé að uppljóstra ríkisleyndarmáli…

Gott í skóinn og verðlaunin

Eins og hjá svo mörgum vinnustöðum, ríkir alltaf spenna og eftirvænting fyrir jólagjöfinni hvert ár. Sem Harpa segir rúsínuna í pylsuendanum og eðlilega ekkert hægt að gefa upp um þau mál á þessari stundu.

Jólanammikassinn sé hins vegar útbúinn fyrir alla starfsmenn, þar á meðal heiðursfólkið áðurnefnda.

„Eitt af því sem ég innleiddi þó eftir að ég byrjaði hér fyrir þremur árum síðan, er leikur sem við köllum Gott í skóinn,“ segir Harpa og útskýrir.

„Gott í skóinn leikurinn er skemmtileg tenging við jólasveinana þrettán. Sem er alltaf skemmtileg tenging fyrir okkur öll en ekki síst skemmtileg leið til að kynna fyrir okkar góða erlenda starfsfólki íslensku jólasveinana og íslensku siðina,“ segir Harpa og bætir við:

„Það er líka svo mikilvægt að vinnustaðir séu meðvitaðir um að starfsfólk erlendis frá, er ekki endilega með stóra fjölskyldu á bakvið sig staðsetta á Íslandi. Inngilding á fjölbreytileikanum snýst þó um það líka að við sem samfélag kennum okkar siði og venjur.“

Gott í skóinn leikurinn er verðlaunaleikur þar sem daglega er tilkynnt um tvö nöfn sem voru dregin úr verðlaunapotti.

„Þau hljóta þá verðlaun sem geta verið allt frá gjafabréf út að borða eða í bíó, snyrtivörur, gjafabréf í verslun og svo framvegis.“

Almennt má heyra í tali Hörpu að fyrirtækið er svolítið mikið jóla jóla barn í sér, ef svo má segja.

„Við skreytum til dæmis mjög snemma, erum fyrst á svæðinu að skreyta hérna úti,“ segir hún og lýsir svæðinu með handabandi.

En er ekki kúnst að búa til gleði og viðburði, án þess að fara yfir strikið; sérílagi á álagstímum?

„Jú vissulega er það kúnst. En rótin er gleði. Við sem störfum hér, erum að vinna að einhverju sem er ætlað að veita öðru fólki gleði; því hvað annað en gleði er konfekt frá okkur? Mér finnst það því ákveðinn metnaður fyrir okkur sem vinnustað að næra fólkið okkar með gleði og hlúa að þeim þannig,“ segir Harpa og bætir við:

Í stóru myndinni vitum við líka að jólum fylgir ákveðin streita. 

Og þar finnst mér líka skipta máli hvernig við sem vinnustaður vinnum að því að aðventan sé það gleðilegur tími að eftir vinnudag, skili það sér í ánægðu fólki heim. 

Þannig á það að vera og í mínum huga er markmiðinu náð þegar við náum því.“