Til Bor­ealis Data Center eftir 22 ár hjá Össuri

Í tilkynningu segir að Stefán komi til Borealis eftir 22 ára feril hjá Össuri en þar hafi hann á undanförnum árum gegnt lykilhlutverki sem framkvæmdastjóri framleiðslu (e. VP of Global Manufacturing) og borið ábyrgð á rekstri framleiðslueininga fyrirtækisins í Reykjavík, Mexíkó, Skotlandi og Bandaríkjunum.

„Stefán er vélaverkfræðingur að mennt, með B.Sc. og M.Sc. gráður frá Háskóla Íslands og stundaði framhaldsnám við Royal Institute of Technology, (KTH) í Stokkhólmi. Á árunum 2022–2024 sat hann sem varamaður í stjórn Samtaka iðnaðarins.

Borealis leggur áherslu á rekstur sjálfbærra gagnavera á norðurslóðum en fyrirtækið rekur þrjú gagnaver hér á landi, á Blönduósi, Fitjum í Reykjanesbæ og á Korputorgi í Reykjavík og einnig í Kajaani í Norður-Finnlandi,“ segir í tilkynningunni. 

Um Borealis Data Center segir að félagið hafi veitt gagnaversþjónustu á Íslandi í meira en áratug og byggi á helstu styrkleikum landsins; grænni orku, hagstæðu loftslagi, tæknivæddu samfélagi og öflugum mannauði sem skapi hér afar góð skilyrði. „Undanfarin ár hefur fyrirtækið aukið þjónustuframboð sitt og í auknum mæli veitt sérhæfðari þjónustu, þar á meðal sérsniðnar innviðalausnir fyrir gervigreind og háafkastaútreikninga. Fyrirtækið er nú í hröðum vexti og hefur fjárfest verulega í frekari uppbyggingu á Blönduósi. Til að mæta ört vaxandi eftirspurn hóf Borealis einnig rekstur í Finnlandi í byrjun árs 2024 en Finnar hafa á undanförnum árum unnið markvisst að því að skapa aðstæður fyrir öflugan gagnaversiðnað þar í landi.“