Ýmir lenti í ís­lensku hakka­vélinni og enn bíður Blær

Ómar Ingi Magnússon var næstmarkahæstur hjá Magdeburg í dag með fimm mörk og hann átti einnig þrjár stoðsendingar. Elvar Örn Jónsson skoraði þrjú mörk og Gísli Þorgeir Kristjánsson tvö, í leik sem aldrei varð spennandi en staðan í hálfleik í GETEC Arena var 22-12.

Magdeburg gerði eitt jafntefli í september en hefur annars unnið þrettán af fjórtán deildarleikjum sínum og er með 27 stig á toppnum, fjórum stigum á undan Flensburg og með leik til góða. Göppingen er með 15 stig í 10. sæti.

Blær og félagar nærri fyrsta sigrinum

Blær Hinriksson og félagar í Leipzig eru á öfugum enda við Magdeburg, á botninum og án sigurs, en lengi vel var útlit fyrir að þeir fengju þann fyrsta gegn Stuttgart í dag. Tólf mínútum fyrir leikslok var Leipzig þremur mörkum yfir, 28-26, en Stuttgart vann að lokum, 33-32.

Blær var meðal markahæstu manna og skoraði sex mörk auk þess að gefa þrjár stoðsendingar.

Arnar Freyr Arnarsson skoraði svo þrjú marka Melsungen í sætum 33-32 sigri gegn Wetzlar í grannaslag. Reynir Þór Stefánsson, sem er að koma sér af stað eftir að hafa ekki mátt æfa og spila framan af leiktíð vegna hjartavandamála, var ekki með Melsungen sem er í 7. sæti með 17 stig.

Jóhannes með fimm gegn GOG

Í Danmörku varð Holstebro, sem Arnór Atlason stýrir, að sætta sig við sex marka tap á heimavelli gegn GOG, 35-29. Jóhannes Berg Andrason skoraði fimm marka Holstebro.