„Ég get spilað fyrir framan tóman sal og fyrir framan fullan sal“

Úrslitaleikurinn á Bullseye í kvöld verður í beinni útsendingu á Sýn Sport Ísland klukkan 20.

Árið hefur verið eftirminnilegt hjá Alexander sem meðal annars hefur fengið að upplifa það að spila við sjálfan heimsmeistarann, Luke Littler, í október.

Nú er svo komið að úrslitaleiknum í Úrvalsdeildinni og Alexander stefnir á að vinna keppnina í fyrsta sinn:

„Halli er mjög góður spilari og ég er bara mjög spenntur að fara að spila á móti honum. Útskotin undir pressu [eru hans styrkleiki]. Honum líður vel uppi á sviði, eða lítur alla vega út fyrir það, og ég þarf að vera tilbúinn í það,“ segir Alexander sem varði gærdeginum að miklu leyti með Halla en nýtti tímann ekki í neitt sálfræðistríð:

„Nei, alls ekki. Við Halli erum mjög góðir vinir og tölum reglulega saman. Það er enginn rígur á milli.“

Halli talaði sjálfur um það í viðtali við Vísi að það væri eins og að blóðið rynni hreinlega ekki í Alexander. Það mun því ekki trufla hann neitt að vita af stórri sjónvarpsútsendingu og fullum sal af fólki á Bullseye í kvöld.

„Að mínu mati skiptir það eiginlega engu máli. Ég get spilað fyrir framan tóman sal og fyrir framan fullan sal. Þetta snýst bara um að hafa gaman og gefa fólkinu smá „show“,“ sagði Alexander og það ætla þeir Halli að gera klukkan 20 í kvöld.