Kristján lætur af störfum hjá Sam­herja

Þetta kemur fram í tilkynningu frá félaginu en Kristján gerði stjórn félagsins grein fyrir ‏‏‏‏‏‏‏‏‏‏‏‏‏‏‏þessari ákvörðun sinni fyrr í mánuðinum og tilkynnti hann sínu nánasta samstarfsfólki um væntanleg starfslok sín í dag.

„Upphaf starfsferilsins má rekja til ársins 1983, ‏‏þegar bræðurnir Kristján og Þorsteinn Vilhelmssynir og frændi þeirra Þorsteinn Már Baldvinsson keyptu nær allt hlutafé í Samherja hf. í Grindavík, sem hafði gert út togarann Guðstein GK 140 og fluttu þeir starfsemina norður til Akureyrar.

Samherji er í dag eitt öflugasta sjávarútvegsfyrirtæki landsins með rekstur í útgerð, fiskeldi og sölu sjávarafurða. Starfsmenn eru um átta hundruð. Höfuðstöðvar félagsins hafa, frá því þeir frændur keyptu Samherja hf., verið á Akureyri og meginþungi starfseminnar á Eyjafjarðarsvæðinu,“ segir í tilkynningunni. 

Kristján og félög hans Sigtún og Landsbyggð hafa á síðustu árum verið virk á fasteignamarkaði og meðal annars byggt upp nýjan miðbæ á Selfoss, auk þess að kaupa ýmis hús, þar með talið höfuðstöðvar Landsvirkjunar við Háaleitisbraut í Reykjavík og Landsbankahúsið í Austurstræti.

Fór fimm ára í sína fyrstu veiðiferð

Fram kemur að Kristján hafi alla tíð haft einlægan áhuga á sjávarútvegi. 

„Faðir hans, Vilhelm Þorsteinsson var framkvæmdastjóri Útgerðarfélags Akureyringa í nærri þrjátíu ár og áður skipstjóri. Kristján var aðeins fimm ára gamall þegar hann fór með föður sínum í sína fyrstu veiðiferð og fyrsta launaseðilinn fékk hann í kringum tíu ára aldurinn fyrir að hnýta spyrðubönd fyrir ÚA.

„Þetta er ekki bara átta til fimm vinna, heldur ástríða og í huganum sitja eftir góðar minningar. Vissulega hefur af og til gefið á bátinn eins og gengur og gerist en af því lærir maður. Allt hefur sinn tíma og þessi tilkynning ætti því í raun ekki að koma neinum á óvart,“ e haft eftir Kristjáni um væntanleg starfslok.

Þá segir hann að stuðningur og skilningur eiginkonunnar, Kolbrúnar Ingólfsdóttur og fjölskyldunnar allrar hafi verið ómetanlegur. „Sjálfsagt hef ég á köflum verið svolítið erfiður í sambúðinni en Kolla mín hefur alltaf stutt mig vel.“