Tveir leik­menn gætu fengið 65 ára fangelsi

Nú eru hafnaboltamenn einnig í vandræðum. Tveir kastarar Cleveland Guardians-liðsins, Emmanuel Clase og Luis Ortiz, voru ákærðir af lögreglu fyrir veðmálabrask. Hinn 26 ára gamli Ortiz var handtekinn í gær í Boston og kemur fyrir dómara í dag, að sögn saksóknara. Hinn 27 ára gamli Clase er ekki í haldi.

Á dögunum sagði Vísir frá því að bylgja veðmálahneyksla gengi yfir Bandaríkin.

Á nokkrum vikum hafa yfir þrjátíu manns úr körfuboltaheiminum, þar á meðal Miami Heat-stjarnan Terry Rozier, verið handteknir grunaðir um aðild að veðmálasvindli. Auk þess hafa sex háskólaleikmenn verið settir í bann vegna gruns um hagræðingu úrslita.

Kastarar grunaðir

Nú skekur nýtt hneyksli bandarísku þjóðina. Kastararnir eru grunaðir um að hafa hagrætt úrslitum leikja.

Saksóknarar í austurhluta New York, sem er skrifstofa ríkissaksóknara Bandaríkjanna í Brooklyn, sögðu í ákærunni að Clase hefði gert samkomulag við veðmálaspilara strax í maí 2023 um að kasta ákveðnum köstum á ákveðinn hátt svo spilarinn gæti lagt undir í sérveðmálum og hagnast.

Ortiz, að sögn saksóknara, gekk til liðs við samsærið í júní 2025 og samanlagt unnu veðmálaspilarar að minnsta kosti 450 þúsund dollara með því að veðja á köst þeirra, á meðan Clase og Ortiz fengu greitt fyrir þátttöku sína. 450 þúsund Bandaríkjadalir eru meira en 57 milljónir króna.

Fangelsisdómur fyrir svik og peningaþvætti

„MLB hafði samband við alríkisyfirvöld í upphafi þessarar rannsóknar og hefur veitt fullan samstarfsvilja í öllu ferlinu. Við erum meðvituð um ákæruna og handtökurnar í dag og innri rannsókn okkar stendur yfir“, segir í yfirlýsingu frá MBL-deildinni.

Í ákærunni kemur fram að tvíeykið eigi yfir höfði sér allt að 65 ára fangelsisdóm fyrir svik og peningaþvætti.

Clase og Ortiz gætu hvor um sig átt yfir höfði sér allt að tuttugu ára fangelsi fyrir samsæri um netsvik, tuttugu ár fyrir samsæri um netsvik gegn heiðarlegri þjónustu, tuttugu ár fyrir samsæri um peningaþvætti og fimm ár fyrir samsæri um að hafa áhrif á íþróttaviðburði með mútum, að sögn saksóknara.

Þær alvarlegustu fyrir íþróttina síðan 1989

Í yfirlýsingu til ESPN neitaði lögmaður Ortiz, Chris Georgalis, ásökununum og sagði að umbjóðandi hans „hefði aldrei, og myndi aldrei, hafa óeðlileg áhrif á leik, ekki fyrir neinn og ekki fyrir neitt.“

Bandarísk yfirvöld hafa tekið hart á hagræðingu úrslita undanfarið.

Þótt útbreiðsla lögleiddra fjárhættuspila hafi umturnað íþróttaheiminum eru ásakanirnar á hendur Clase og Ortiz þær alvarlegustu fyrir íþróttina síðan Pete Rose samþykkti ævilangt bann fyrir að veðja á hafnabolta árið 1989.

Reglur MLB gegn fjárhættuspilum í íþróttinni eru strangar og Clase og Ortiz gætu átt yfir höfði sér ævilöng bönn svipuð því sem Tucupita Marcano, innherji San Diego Padres, fékk á síðasta ári, en hann lagði undir í næstum fjögur hundruð veðmálum á hafnabolta.