Mickelson blandast aftur inn í innherjasvikamál

Mickelson, sem er þekktur fyrir glæfraleg fjárhættuspil í gegnum tíðina, hefur talað um fátt annað á samfélagsmiðlum undanfarna mánuði en olíufélagið Sable Offshore sem hann fjárfesti í. 

Nú kannar fyrirtækið hvort að forstjóri þess hafi deilt innherjaupplýsingum með Mickelson sem hafi svo komið þeim til annarra fjárfesta. Mickelson sjálfur segir allar fregnir um slíkt rógburð.

Bjuggust við skjótfengnum gróða af lokuðum olíuborpalli

Sable Offshore keypti olíuborpall í Kyrrahafi utan stranda Kaliforníu af olíurisanum Exxon á hátt í milljarð dollara. Borpallinum var lokað í kjölfar umhverfisslyss sem átti sér stað árið 2015.

Veðjuðu stjórnendur Sable á að þeim tækist að hefja starfsemi á borpallinum fljótt en þá væri kaupverðið gjöf en ekki gjald. Ekkert hefur hins vegar orðið úr því ennþá og hlutir í Sable hafa hrunið um helming í verði síðasta árið, að því er segir í frétt Golf.com.

Mickelson, og fulltrúar Sable, hafa þrýst fast á stjórnvöld í Kaliforníu og ríkisstjórann Gavin Newsom að gefa starfseminni grænt ljós.

Lét fjárfesta vita af yfirvofandi tilkynningu

Bandaríski fjármálavefurinn Hunterbrook heldur því nú fram að Mickelson hafi fengið innherjaupplýsingar frá Sable og deilt þeim í hópspjalli fjárfesta í félaginu á samfélagsmiðlinum X. Vitnaði vefurinn til einkaskilaboða frá Mickelson í spjallinu.

Mickelson hafi meðal annars látið fjárfestana vita um væntanlega tilkynningu frá Sable sama dag og fyrirtækið senda hana út frá sér.

Kylfingurinn brást við ásökununum með því að saka Hunterbrook um rógburð. Hann hefði ekki stundað nein viðskipti með hlutabréf eftir upplýsingar sem hann fékk um væntanlegar vendingar hjá Sable.

Sakaði hann miðilinn jafnframt um markaðsmisnotkun. Hunterbrook rekur einnig fjárfestingasjóð sem notfærir sér meðal annars upplýsingar sem fjölmiðlaarmur fyrirtækisins aflar sem vekur upp alls kyns spurningar um mögulega hagsmunaárekstra í umfjöllun hans. Fulltrúar Hunterbrook halda því fram að þeir hafi heldur ekki stundað nein viðskipti út á upplýsingarnar í fréttinni um Mickelson og Sable.

Greiddi milljón dollara í sekt

Þetta er ekki í fyrsta skipti sem Mickelson blandast inn í innherjamál. Hann gerði sátt við Verðbréfaeftirlit Bandaríkjanna (SEC) og greiddi milljón dollara í sekt vegna ásakana um að hann hefði stundað innherjaviðskipti árið 2016.

Viðskiptafélagi Mickelson, sem fékk honum innherjaupplýsingar um skráð fyrirtæki, var dæmdur í fimm ára fangelsi vegna innherjasvikanna sem sköffuðu honum tugi milljóna dollara í ávinning. Hann afplánaði þó ekki allan dóminn því Donald Trump náðaði hann rétt áður en hann yfirgaf Hvíta húsið árið 2021.

Í ákærunni á hendur viðskiptafélaginu var Mickelson svonefndur ónefndur vitorðsmaður. Áleitnar spurningar hafa verið uppi um hvers vegna kylfingurinn var ekki sjálfur ákærður fyrir sinn þátt í svikunum.

Viðskiptafélaginn, Billy Walters, hélt því síðar fram í bók sem hann gaf út að Mickelson hefði lagt rúman milljarð undir í veðmálum undanfarna þrjá áratugi. Hann hefði meðal annars viljað leggja stórfé undir úrslit Ryder-bikarsins sem hann keppti sjálfur í árið 2012.

Í kjölfarið gekkst Mickelson við því að hann ætti við spilafíkn að stríða en að hann hefði aldrei ógnað fjárhagslegu öryggi fjölskyldu sinnar með fjárhættuspili sínu.