Fljúga með þyrlu á milli landa til að ná að keppa

Um helgina fer fram sýningarmótið „Loop One“ í fyrsta sinn en það verður haldið í Ólympíugarðinum í München.

Tímabilið byrjar vanalega ekki svo snemma hjá bestu skíðaskotfimimönnum heims og norska ríkisútvarpið segir að það séu ekki allir ánægðir með þessa nýjung Alþjóðaskíðaskotfimissambandsins (IBU).

Keppnin rekst meðal annars á við háfjallaæfingabúðir norska landsliðsins í Lavazè þar sem undirbúningurinn fyrir Vetrarólympíuleikana er þegar hafinn.

„Það verður svolítið erfitt að gera hvort tveggja. En svo hafa stjórnendurnir fundið lausn sem er eins hagkvæm og mögulegt er, sem er kannski ekki það sem við viljum standa fyrir hvað varðar sjálfbærni,“ sagði Sturla Holm Lægreid við NRK. 

Þar vísar hann í átak hjá skíðagöngumönnunum að minnka losun gróðurhúsalofttegunda var nefnt af Norska skíðaskotfimissambandinu sem eitt af þremur mikilvægum málum fyrir sambandið undir þemanu sjálfbærni. Þeir hafa sett sér það undirmarkmið að minnka kolefnisspor sitt fyrir árið 2026.

Lausnin er því ekki hagkvæm fyrir umhverfið en hún er sú að norsku skíðaskotfimistjörnurnar munu taka þyrlu frá Norður-Ítalíu til Þýskalands, ferð sem tekur eina klukkustund en þetta eru um tvö hundruð kílómetrar í beinni loftlínu. Sama vegalengd myndi taka um fimm klukkustundir í bíl.

Þyrluflugið kostar fjórtán þúsund evrur fram og til baka, sem eru tæplega tvær milljónir í íslenskum krónum.

Að sögn Per Arne Botnan, íþróttastjóra hjá Norska skíðaskotfimissambandinu, stefna þeir nú á að taka tvær þyrlur til að koma öllum keppendum og þjálfurum frá Lavazè.

„Þetta er ekki eitthvað sem ég vildi í upphafi, en svo koma Ólympíuleikarnir og þetta er eitthvað sem við teljum okkur neydd til af IBU. Þetta var eina leiðin til að takmarka skaðann af háfjalladvölinni,“ sagði Lægreid.