Skoða hvort miðasölu­brask FIFA sé ólög­leg veðmála­starf­semi

FIFA selur nú svokölluð stafræn skírteini (NFT) en það er tegund af sýndareignum sem hafa rutt sér til rúms á undanförnum árum samhliða vexti rafmynta. Skírteinin innihalda stafrænar útgáfur af atvikum á mótum FIFA og spjöld með leikmönnum í takmörkuðu upplagi, að því er kemur fram á vefsíðu sambandsins.

Sumum þessara skírteina fylgir réttur til þess að kaupa miða á ákveðna leiki á heimsmeistaramótinu sem verður haldið í Norður-Ameríku á næsta ári. Sá réttur er þó háður ýmsum breytum, meðal annars hvort að lið þess sem kaupir skírteinið komist á mótið. Þá eru ýmis skilyrði fyrir hvers konar miða viðkomandi fær tækifæri til að kaupa.

Bloomberg-fréttastofan (áskriftarvefur) sagði frá því í síðustu viku að svissnesk eftirlitsstofnun hefði nú til athugunar hvort að þessi sala FIFA á NFT-skírteinum ætti að falla undir lög um veðmálastarfsemi. Forstöðumaður stofnunarinnar sagði fjölmiðlinum að hún væri að safna gögnum og að engin formleg kvörtun hefði borist vegna sölunnar.

Verð á skírteinunum fyrir HM 2026 er á bilinu 299 til 999 dollarar, jafnvirði rúmlega 36 þúsund til rúmlega 121 þúsund íslenskra króna, eftir því hversu líklegt lið er til þess að komast á mótið, að sögn rafmyntafréttasíðunnar Cryptonews. Þannig er dýrara að kaupa skírteini fyrir stórþjóðir eins og Brasilíu, Argentínu og England en fyrir minni spámenn. Kaupendur skírteinanna þurfa svo að greiða sérstaklega fyrir miðana sjálfa.

Cryptonews segir að mörg skírteinanna séu þegar uppseld. Þau ganga hins vegar kaupum og sölum á sérstöku markaðstorgi með þau. Endursöluverð þeirra þar er sagt geta hlaupið á hátt í milljón íslenskra króna.

FIFA segist hafa tekið upp þetta kaupréttarkerfi til þess að bregðast við gríðarlegri umframeftirspurn eftir miðum á leiki á HM. Þannig hafi 3,4 milljónir miða verið í boði á leik á mótinu í Katar árið 2022 en eftirspurn var eftir 23 milljónum miða.