Nær­liggjandi hús rýmt þegar eldur kom upp á Ásbrú í morgun

Allt tiltækt lið var kallað út og búið er að ná tökum á eldinum sem var mikill í fyrstu, að sögn Eyþórs Rúnars Þórarinssonar slökkviliðsstjóra.  

„Við fengum tilkynningu rúmlega fjögur í nótt um að eldur væri kviknaður. Þetta eru tvö fyrirtæki, köfunarþjónusta og partasala, og það var töluverður eldur í viðbyggingu á bakvið sem var búinn að læsa sig í þakið.“

Eyþór segir að slökkvistarf hafi gengið ágætlega og að tekist hafi að halda eldinum í annarri álmu hússins en vernda hina. Hann segir að húsið hafi verið mannlaust og að eldurinn hafi líklegast kraumað í viðbygginguni frá því í gærkvöldi, þegar menn voru þar við vinnu. 

Íbúar voru í nærliggjandi húsi og segir Eyþór að það hús hafi verið rýmt. „Ég veit ekki alveg fjöldann sem var þar inni en það var rýmt þegar reykurinn stóð á það í nótt,“ segir Eyþór.

Lögregla mun rannsaka eldsupptök þegar búið er að tryggja að enginn eldur sé eftir í byggingunni.