Evrópa með af­gerandi for­ystu fyrir loka­daginn

Þeir J.J. Spaun og Xander Schauffele unnu sitt einvígi gegn Jon Rahm og Sepp Straka en Evrópumennir unnu hin þrjú einvígin og leiða því með 11 og hálfan vinning gegn 4 og hálfum vinningum Bandaríkjanna.

Bandarísku kylfingarnir hafa ekki náð sér á strik og sigur Evrópu virðist innan seilingar annað mótið í röð en Evrópusveitin þarf aðeins þrjá vinninga enn til að tryggja sér sigur.

Mótið í ár hefur ekki beinlínis farið siðsamlega fram. Fyrr í kvöld greindum við frá orðaskiptum Rory McIlroy við áhorfendur sem voru ekki beinlínis við hæfi barna og þá varð önnur sérkennileg uppákoma seinna í kvöld þar sem kylfusveinar og kylfingar fóru í hár saman á milli hola, en upptöku af uppákomunni má sjá hér að neðan.

Mótið heldur áfram á morgun og verður að sjálfsögðu í beinni útsendingu á Sýn Sport 4 og hefst útsending klukkan 11:00.