Farið yfir Vítis­englamálið og dróna­varnir á Ís­landi

Við ræðum við dósent í tölvunarfræði sem nefnir fjögur dæmi þar sem notkun gervigreindar hefur átt þátt í sjálfsvígi. Gervigreindin endi oft á villigötum í lengri samtölum og ekki hægt að hafa fulla stjórn á henni.

Forsætisráðherra Bretlands segir breska fánann aldrei mega nota sem tákn ofbeldis, ótta og sundrunar. Þessi orð lét ráðherrann falla í kjölfar þess að hundrað og fimmtíu þúsund manns mótmæltu innflytjendastefnu stjórnvalda á götum Lundúnar í gær.

Sérfræðingur í öryggis- og varnarmálum segir atburði síðustu daga sýna að íslensk stjórnvöld ættu að skoða að setja upp drónaloftvarnir. Rússar flugu drónum tvisvar inn fyrir lofthelgi NATO-ríkja í síðustu viku.

Sundlaugargestir laugarinnar í Reykholti í Biskupstungum munu ekki geta stungið sér þar til sunds í heilt ár því taka á laugina og allt svæðið í gegn en kostnaðurinn nemur átta hundruð milljónum króna.

Um helgina stóð Kattaræktarfélag Íslands fyrir sérstakri kynningardagskrá í Garðheimum í Breiðholti, þar sem gestir gátu kynnt sér fjölbreyttar kattategundir – hver annarri ólíkari, meðal annars ketti með enga rófu.