Að­eins þrjú lið fengið færri stig í seinni um­ferðinni en meistararnir

Breiðablik tapaði fyrir botnliði ÍA, 3-0, á Akranesi í lokaleik 21. umferðar Bestu deildarinnar í gær. Skagamenn hafa unnið báða leikina gegn Blikum í sumar með markatölunni 7-1.

Eftir fyrri umferðina var Breiðablik í 2. sæti deildarinnar með 22 stig, einu stigi á eftir toppliði Víkings. Þegar ein umferð er eftir af hefðbundinni deildarkeppni eru Blikar í 4. sæti með 33 stig, sjö stigum á eftir toppliði Valsmanna.

Breiðablik hefur því aðeins náð í ellefu stig í tíu leikjum í seinni umferðinni. Aðeins ÍA (10), Vestri (8) og Afturelding (7) hafa fengið færri stig í seinni umferðinni en Íslandsmeistararnir.

Blikar hafa aðeins unnið tvo leiki í seinni umferðinni og ekki unnið í síðustu sex deildarleikjum. Í þeim hefur liðið fengið á sig samtals fjórtán mörk en skorað níu.

Breiðablik hefur staðið í ströngu undanfarnar vikur en auk þess að spila í deildinni hefur liðið verið á fullri ferð í Evrópukeppnum og er komið í riðlakeppni Sambandsdeildar Evrópu í annað sinn á þremur árum.

Stig í seinni umferðinni

Topplið Vals hefur náð í flest stig í seinni umferðinni, eða 22. Þar á eftir kemur Stjarnan (20) og svo FH (18). Eftir fyrri umferðina voru FH-ingar í fallsæti en núna eru þeir í 5. sætinu og í góðri stöðu til að tryggja sér sæti í úrslitakeppni efri hlutans.

Hefðbundinni deildarkeppni lýkur á sunnudaginn og mánudaginn. Þá kemur í ljós hvaða lið fara í hvora úrslitakeppnina. Ljóst er að Valur, Víkingur, Stjarnan og Breiðablik verða í efri hlutanum og KR, Afturelding og ÍA í neðri hlutanum.

22. umferð Bestu deildar karla