Vesturbæjarlaug opnar enn á ný

Laugin lokaði um miðjan dag í gær eftir að í ljós kom að þrep ofan í laugina voru enn of hál og að það þyrfti að endursanda þau. Að því er fram kemur í tilkynningu frá Reykjavíkurborg gekk verkið vel.

Þetta er fagnaðarerindi fyrir borgarbúa en þetta er í þriðja sinn sem lauginni hefur verið lokað vegna framkvæmda undanfarna mánuði. Hún var lokuð í um tvo mánuði í sumar vegna viðgerða og skömmu eftir opnuna komu í ljós vankantar á málningarvinnu þar sem málningin var tekin að flagna af botni laugarinnar.