„Ein­hver blástur en ekkert sem á að hafa svaka­leg á­hrif“

„Veðrið er bara þokkalegt, það versta gengið yfir. Annars værum við ekki að spila, ef þetta væri eins og í gær. Það er einhver blástur en ekkert sem á að hafa svakaleg áhrif á leikinn…

Það var snarvitlaust veður hérna í nótt, í kringum miðnætti, en það er miklu betra veður núna“ segir Þorlákur Árnason, þjálfari ÍBV.

„Það er einhver gjóla sem mun kannski hafa einhver áhrif á leikinn, en þetta er ekkert sem menn hafa ekki lent í áður“ hélt hann svo áfram og sagði Vestmannaeyinga öllu vönu.

Þjóðhátíðarleikurinn er árleg hefð í Vestmannaeyjum og er, samkvæmt venju, eini meistaraflokksleikurinn sem fer fram á Íslandi í dag. Þorlákur segir sérstakt fyrir Eyjamenn að spila á þessum degi.

„Auðvitað er skrítið fyrir Eyjamenn að spila þegar það er svona mikið í gangi. Það eru skiptar skoðanir um að spila á laugardeginum hjá okkur heimamönnum.

En þetta er náttúrulega stærsti leikur ársins, flestir áhorfendur sem koma á þennan leik og við hlökkum bara til að spila við KR-inga“ segir Þorlákur.

Leikur ÍBV og KR hefst klukkan tvö og verður í beinni útsendingu á Sýn Sport frá 13:45.