Jóhannes ræddi ekki við Val: „Ef ég ætlaði að fara frá KR var það alltaf bara út“

Ágúst Orri Arnarson skrifar 1. ágúst 2025 15:01

Jóhannes Kristinn Bjarnason ræddi ekki við Val eða nein önnur félög á Íslandi. Hugurinn leitaði út og hann samdi við Kolding í Danmörku. vísir

Jóhannes Kristinn Bjarnason gæti spilað sinn fyrsta leik fyrir danska liðið Kolding á eftir. Hann segir erfitt að kveðja uppeldisfélagið KR og gat ekki hugsað sér að semja við Val.

Líst vel á verkefnið í Danmörku

„Ég talaði við þjálfarann og eiganda liðsins, þeir útskýrðu verkefnið og hvað þeir vilja gera hérna. Ég varð strax mjög spenntur, það lítur allt mjög vel út hérna og ég fíla þjálfarann og hans hugmyndir“ segir Jóhannes um sitt nýja félag, Kolding, sem spilar í næstefstu deild Danmerkur.

Jóhannes á æfingu með Kolding í vikunni.kolding

Jóhannes skrifaði undir hjá Kolding síðasta þriðjudag og hefur æft með liðinu alla vikuna. Hann gæti svo spilað fyrsta leikinn á eftir, þegar Kolding tekur á móti HB Köge.

Kolding vann fyrsta leik tímabilsins gegn Aalborg en tapaði síðan gegn Horsens. Stefna félagsins er að fara upp um deild og spila í úrvalsdeildinni á næsta ári.

„Það er bullandi stefna hjá klúbbnum að fara upp og þeir hafa mikla trú á því að árið í árið sé árið sem þeir fara upp. Það er stefnan og svolítið svipað og hjá KR viljum við spila okkar fótbolta.“

Jóhannes skoraði sex mörk fyrir KR í sumar.vísir

Erfitt að kveðja KR og Valur kom ekki til greina

Jóhannes segir erfitt að fara frá uppeldisfélaginu en var spenntur fyrir því að reyna aftur fyrir sér í atvinnumennsku erlendis.

„Ég hefði alveg viljað klára tímabilið með KR en þegar svona tækifæri koma þá verður maður bara að stökkva á það“ segir Jóhannes, sem stökk þó ekki á tækifærið sem bauðst í Ítalíu.

Pro Vercelli í Serie C deildinni á Ítalíu reyndi að fá Jóhannes til félagsins og hann fór út að skoða aðstæður, en leist ekki vel á.

„Mér leið bara ekki vel með það, þetta var ekkert meira en bara svona gut feeling hjá mér“ segir Jóhannes um ítalska félagið en það var eina félagið fyrir utan Kolding sem hann skoðaði af einhverri alvöru.

Jóhannes bar fyrirliðabandið í nokkrum leikjum hjá KR þegar Aron Sigurðarson var fjarverandi.vísir

Valur reyndi líka að lokka Jóhannes úr Vesturbænum en hann gat ekki hugsað sér að spila á Hlíðarenda.

„Nei, þetta kom mér alveg á óvart þegar fréttin kom á Fótbolti.net. Ég hafði ekkert pælt í þessu, ég er með góðan umboðsmann í þessu fyrir mig. Ég talaði ekki við nein lið á Íslandi…

Mér fannst þetta skrítið en svona er þetta á Íslandi, það eru alltaf einhverjar sögur sem fara í gang…

Ef ég ætlaði að fara frá KR var það alltaf bara út“ segir Jóhannes.

KR Danski boltinn Besta deild karla